2026 оны хөлбөмбөгийн ДАШТ-д шинэ түүх бичиж буй Кабо Вердийн шигшээ баг дахин нэг гайхамшгийг бүтээлээ. Испанитай гоолгүй тэнцэж дэлхий нийтийг шуугиулсан Африкийн жижиг арлын улсын баг энэ удаа дэлхийн хоёр удаагийн аварга Уругвайтай 2:2-оор тэнцэн гайхамшгийг бүтээлээ.

Майамид болсон H хэсгийн тоглолтод Кабо Вердийн шигшээ баг түүхэн анхны гоолоо оруулав. Тоглолтын 21 дэх минутад хагас хамгаалагч Кевин Пина гайхалтай чөлөөт цохилтоор гоолдож, улсынхаа ДАШТ-ий түүхэн дэх анхны гоолыг оруулав. Анх удаа дэлхийн аваргад оролцож буй багийн хувьд энэ нь мартагдашгүй мөч байлаа.

Гэвч туршлагатай Уругвайн шигшээ бууж өгсөнгүй. Макси Араухо тоог тэнцүүлж, улмаар Агустин Каноббио гоолдсоноор өмнөд америкчууд эхний үеийг 2:1-ийн харьцаатай өндөрлүүлэв. Тухайн мөчид олон хүн фаворит баг ялалтаа баталгаажуулна гэж бодож байсан биз ээ.

Харин Кабо Верде өөр төлөвлөгөөтэй байв. Хоёрдугаар үед Уругвайн хамгаалалт болон хаалгач Фернандо Муслерагийн алдааг Хелио Варела овжин ашиглаж, тооны харьцааг 2:2 болголоо. Үлдсэн хугацаанд Уругвай шахалт үзүүлсэн ч Африкийн төлөөлөгч хамгаалалтаа чадварлаг зохион байгуулж, үнэтэй нэг оноог авч чадсан юм.

Ингэснээр Кабо Верде хоёр тоглолтоос хоёр оноо цуглуулж, хэсгээс гарах боломжоо хадгалан үлдэв. Тэд эхний тоглолтдоо Европын аварга Испанитай 0:0-ээр тэнцсэн бол одоо Уругвайтай 2:2-оор тэнцээд байна. Хоёр тоглолтын дараа Испани хэсгийг тэргүүлж байгаа ч Кабо Верде хасагдах шатанд шалгарах бодит боломжтой баг гэдгээ баталлаа.

Энэ амжилтын гол баатруудын нэг нь 40 настай ахмад хаалгач Возинья юм. Испанийн эсрэг тоглолтод тэр долоон аюултай цохилтыг хааж багаа аварсан бол ДАШТ эхэлснээс хойш дэлхийн хэвлэлүүдийн анхаарлын төвд орж байна. Хагас сая ч хүрэхгүй хүн амтай улсын шигшээ баг ийнхүү дэлхийн аваргын хамгийн том үлгэрийг бичиж эхлэв. ДАШТ бүр өөрийн гэсэн үлгэртэй байдаг. 2026 оны тэмцээний тэр үлгэрийн нэр нь одоогоор Кабо Верде болоод байна.

Л.Баяр