Колумбын ерөнхийлөгчийн сонгууль Латин Америкийн улс төрийн хамгийн анхаарал татсан үйл явдлуудын нэг болж өндөрлөлөө. АНУ-ын Ерөнхийлөгч Доналд Трампын дэмжлэгийг ил тод авсан барууны үзэлтэй хуульч, бизнес эрхлэгч Абелардо де ла Эсприэлья тун ойр саналын зөрүүгээр ялалт байгуулж, тус улсын дараагийн төрийн тэргүүн болох нь тодорхой болов.

Урьдчилсан дүнгээр де ла Эсприэлья нийт саналын 49.6 орчим хувийг авч, зүүний хүчний нэр дэвшигч, сенатор Иван Сепедагийн өмнө гарсан байна. Хоёр нэр дэвшигчийн саналын зөрүү 250 мянга хүрэхгүй байсан нь Колумбын сүүлийн үеийн түүхэн дэх хамгийн өрсөлдөөнтэй сонгуулийн нэг болжээ.

47 настай де ла Эсприэлья өмнө нь сонгогдсон улс төрийн албан тушаал хашиж байгаагүй ч гэмт хэрэгтэй хатуу тэмцэх, татвар бууруулах, газрын тос, хийн салбарыг өргөжүүлэх, төрийн бүтцийг цомхотгох зэрэг амлалтаар олон сонгогчийн дэмжлэгийг авсан байна. Тэрээр сонгуулийн кампанит ажлынхаа турш Дональд Трамп, Аргентины Ерөнхийлөгч Хавьер Милей, Сальвадорын Ерөнхийлөгч Найиб Букеле нарыг үлгэр дуурайл болгон нэрлэж байжээ.

             Харин түүний өрсөлдөгч Иван Сепеда нь одоогийн Ерөнхийлөгч Густаво Петрогийн ойрын холбоотон бөгөөд Петрогийн эхлүүлсэн нийгмийн болон энхийн хэлэлцээний бодлогыг үргэлжлүүлэхээ амлаж байсан юм. Сонгуулийн дараа Сепедагийн штаб болон Ерөнхийлөгч Петро нар санал тоолох ажиллагаанд эргэлзээ байгааг мэдэгдэж, хэдэн арван мянган санал авах байрны дүнг шалгуулахаар болсон байна.

Де ла Эсприэльягийн ялалт нь зөвхөн Колумб төдийгүй Латин Америк даяар барууны хүчнүүд сэргэн хүчирхэгжиж байгаагийн нэг илрэл гэж ажиглагчид үзэж байна. Сүүлийн жилүүдэд Аргентин, Сальвадор зэрэг орнуудад ижил чиг хандлагатай удирдагчид гарч ирсэн бол Колумб ч энэ давалгаанд нэгдэж байна.

Гэсэн ч шинэ ерөнхийлөгчийн өмнө томоохон сорилтууд хүлээж байна. Түүний улс төрийн хүчин парламентын олонх биш бөгөөд аюулгүй байдал, хар тамхины наймаа, эдийн засгийн хүндрэл зэрэг асуудлыг шийдвэрлэхийн тулд бусад намуудтай хамтран ажиллах шаардлагатай болох юм.

Ингэснээр 2022 онд түүхэндээ анх удаа зүүний ерөнхийлөгч сонгосон Колумб улс дөрвөн жилийн дараа улс төрийн огцом эргэлт хийж, барууны чиг баримжаатай шинэ удирдагчийг төрийн тэргүүнээрээ сонгож байна.