Испанийн шигшээ баг Португалыг 1:0-ээр буулган авч, хөлбөмбөгийн ДАШТ-ий шөвгийн наймд шалгарлаа. Даллас хотод болсон шөвгийн 16-гийн тоглолт үндсэн цагийн турш тэнцүүхэн өрнөсөн ч Испани шийдвэрлэх мөчид боломжоо ашиглаж чадсан юм. Сэлгээнээс талбайд гарч ирээд ердөө зургаан минут болсон хагас хамгаалагч Микель Мерино 91 дэх минутад Ферран Торресын дамжуулалтыг гоол болгон хувиргаж, багтаа ялалт авчирлаа.

Ингэснээр Испани шөвгийн наймд шалгарч, дараагийн шатанд Бельгитэй тоглохоор болов. Харин Португал тэмцээнээ өндөрлүүлсэн бөгөөд 41 настай Криштиану Роналдугийн хувьд энэ нь дэлхийн аваргын тэмцээн дэх сүүлчийн тоглолт болсон гэж олон улсын хэвлэлүүд онцолж байна.

Нөгөө талд Бельгийн шигшээ баг АНУ-ыг 4:1-ээр буулган авч, хөлбөмбөгийн ДАШТ-ий шөвгийн наймд шалгарлаа. Сиэтл хотод болсон шөвгийн 16-гийн тоглолтод Бельги эхнээсээ илүүрхэж, Чарльз Де Кетеларе 23, 33 дахь минутанд хоёр гоол оруулан багаа тэргүүлүүлэв. АНУ 31 дэх минутад Малик Тиллманы чөлөөт цохилтын гоолоор тооны харьцааг тэнцүүлсэн ч удалгүй дахин гоол алдаж, давуу байдлаа алджээ.

Хоёрдугаар үед Бельгийн довтолгоо үргэлжилж, Жереми Доку 68 дахь минутад багийнхаа гурав дахь гоолыг оруулсан бол Ромелу Лукаку нэмэлт цагийн гурав дахь минутад (90+3) тооны харьцааг 4:1 болгон эцэслэв. Ингэснээр Бельги шөвгийн наймд Испанийн шигшээ багтай тоглохоор болсон бол тэмцээнийг зохион байгуулагчдын нэг АНУ ДАШТ-ээ өндөрлүүллээ.

Л.Баяр