2026 оны хөлбөмбөгийн ДАШТ-ий шөвгийн 16-гийн Франц, Парагвайн тоглолтын дараа талбай дээрх өрсөлдөөн улс төр, нийгмийн томоохон маргаан болон өргөжив. Францын шигшээ багийн ахлагч Килиан Мбаппе болон Парагвайн сенатор Селесте Амарилья нарын хооронд үүссэн маргаан дэлхийн спортын ертөнцийн анхаарлыг татаж, арьс өнгөөр ялгаварлан гадуурхалтын эсрэг тэмцлийн шинэ жишээ болов.
Франц Парагвайг 1:0-ээр буулган авч, Мбаппегийн торгуулийн цохилтын гоолоор шөвгийн наймд шалгарсан. Тоглолтын дараа Парагвайн сөрөг хүчний сенатор Селесте Амарилья нийгмийн сүлжээнд Мбаппегийн гарал үүсэл, арьсны өнгийг доромжилсон, арьс өнгөөр ялгаварлан гадуурхсан агуулгатай нийтлэл бичжээ. Түүний нийтлэл олон улсын хэмжээнд хүчтэй шүүмжлэл дагуулсан юм.
Үүний хариуд Килиан Мбаппе сенаторыг "төрийн албан тушаал хаших эрхэм хүнд тохирохгүй хүн" хэмээн буруутгаж, түүний үг Парагвайн шигшээ багийн ДАШТ-д үзүүлсэн бахархам амжилтыг хүртэл бүдгэрүүлж байгааг онцолсон байна. Мөн тэрээр үзэн ядалт, арьс өнгөөр ялгаварлан гадуурхалтыг хэзээ ч зөвтгөж болохгүй гэж мэдэгджээ.
Маргаан үүгээр зогссонгүй. Францын Хөлбөмбөгийн холбоо сенаторын мэдэгдлийг "жигшүүртэй бөгөөд хүлээн зөвшөөрөх боломжгүй" хэмээн үзэж, хууль хяналтын байгууллагад гомдол гаргасан байна. Улмаар Парисын прокурорын газар арьс өнгөөр ялгаварлан гадуурхсан, үзэн ядалтыг өдөөсөн байж болзошгүй гэх үндэслэлээр албан ёсны мөрдөн шалгах ажиллагаа эхлүүлжээ.
Харин Селесте Амарилья дараа нь анхны нийтлэлээ устгаж, зарим үгэндээ харамсаж байгаагаа илэрхийлсэн ч Мбаппе өөрийг нь олон нийтийн өмнө доромжилсон хэмээн буруутгаж, уучлал шаардаж, шаардлагатай бол хууль зүйн арга хэмжээ авахаа мэдэгдсэн байна. Энэ хэрэгт Парагвайн Засгийн газар сенаторын байр суурийг албан ёсны байр суурь биш болохыг онцолж, хүний эрх, хүндэтгэл, ялгаварлан гадуурхахгүй байх зарчмыг дэмжиж байгаагаа мэдэгдсэн. Францын Ерөнхийлөгч Эммануэль Макрон мөн Мбаппег дэмжиж, арьс өнгөөр ялгаварлан гадуурхалтын эсрэг тууштай байр суурь илэрхийлсэн юм.
Талбай дээрх нэгэн тоглолтын дараа эхэлсэн энэхүү маргаан спортын хил хязгаарыг давж, олон нийтийн хариуцлага, улс төрчдийн ёс зүй, арьс өнгөөр ялгаварлан гадуурхалтын эсрэг тэмцлийн талаар дахин хэлэлцэх шалтгаан болж байна.
Л.Баяр
