Дэлхийн аваргын өмнөхөн олон хүн Францыг энэ удаагийн тэмцээний хамгийн хүчирхэг баг хэмээн нэрлэж байв. Килиан Мбаппе, Усман Дембеле, Дезире Дуэ зэрэг довтолгооны оддоор зэвсэглэсэн тэд хэсгийн шатнаас эхлээд өрсөлдөгчдөө нэг нэгээр нь буулган авч, түрүүлэх гол фаворитын байр суурийг баталгаажуулсан. Гэвч аваргын төлөөх замын хамгийн хүнд шалгалт болох хагас шигшээд Испанитай учрахад бүх зүйл өөрөөр эргэв.

Испаничууд Арлингтонд болсон тоглолтын эхний минутаас л бөмбөг эзэмшил, хэмнэл, байрлалын тоглолтоор өрсөлдөгчөө шахаж эхэлсэн. Франц хамгаалалтаас довтолгоонд шилжих боломжоо төдийлөн гаргаж чадсангүй. Харин Испанийн залуу бүрэлдэхүүн итгэлтэй, тайван тоглолтоо үргэлжлүүлсээр эхний гоолоо хүртэл хүлээсэн юм.

Тоглолтын гол дүрийн нэг нь дахин Ламин Ямал байлаа. Ердөө өсвөр насандаа дэлхийн хөлбөмбөгийн хамгийн том тайзан дээр тоглолтын хувь заяаг шийдэх хэмжээний нөлөө үзүүлж буй түүний зоримог довтолгоо Францын хамгаалагчдыг байнга сандаргаж байв. Ямалын торгуулийн талбайд хийсэн аюултай нэвтрэлтийн дараа Испани торгуулийн цохилт авч, туршлагатай довтлогч Микель Оярсабаль алдаа гаргалгүй ашигласнаар тоглолтын салхийг эргүүлэв.

Эхний гоол Францын төлөвлөгөөг бүрэн өөрчилсөн. Дидье Дешамын баг довтлох шаардлагатай болсон ч Испанийн хамгаалалт тун нягт ажиллаж, Родри, Педри, Дани Олмо нарын төвийн шугам бөмбөгийг өөрсдийн мэдэлд хадгалсаар байлаа. Францын хамгийн том давуу тал болох хурдан сөрөг довтолгоо энэ өдөр бараг ажилласангүй.

Хоёрдугаар үед Испани давамгай байдлаа улам баталгаажуулсан. Багийн уялдаа холбоотой олон дамжуулалтын төгсгөлд хамгаалагч Педро Порро довтолгоонд нэгдэн хоёр дахь гоолыг оруулснаар тоглолтын хувь заяаг үндсэндээ шийдэв. Испанийн хоёр дахь гоол бол зөвхөн нэг тоглогчийн ур чадвар биш, харин бүхэл бүтэн системийн төгс ажиллагааг харуулсан довтолгоо байлаа.

Францын хувьд хамгийн том урам хугарсан зүйл нь одууд нь шийдвэрлэх мөчид өөрсдийн тоглолтыг гаргаж чадаагүй явдал байв. Мбаппе хамгаалагчдын хатуу шахалтад орж, Дембеле аюултай орон зай олсонгүй. Довтолгооны шугам нь тус тусдаа ур чадвараа харуулсан ч Испанийн зохион байгуулалттай хамгаалалтыг нураах хэмжээний хамтын ажиллагааг үзүүлж чадсангүй. Тэмцээний турш гайхалтай харагдсан Франц энэ удаа жинхэнэ хүчтэй өрсөлдөгчтэй тулгарахад арга мухардсан дүр зурагтай үлдлээ.

Харин Испани эсрэгээрээ багийн тоглолт ямар үнэ цэнтэйг дахин нотлов. Нэр алдраас илүү хөдөлгөөн, сахилга бат, бөмбөгийн зөв эргэлт, өндөр шахалт нь тэдний хамгийн том зэвсэг байлаа. Залуу тоглогчид туршлагатай ахлагч нартайгаа төгс зохицож, нэгэн цул баг болж чадсан нь финалд хүрэх гол шалтгаан болов.

Энэ ялалт Испанийг 2010 оноос хойш анх удаа ДАШТ-ий финалд хүргэж байна. Харин Франц гурав дахь дараалсан финалд шалгарах мөрөөдлөө ийнхүү өндөрлүүлэв.

Одоо бүх анхаарал ням гаргийн аваргын төлөөх тулаанд төвлөрч байна. Испани Англи, Аргентины хожсонтой нь алтан цомын төлөө тоглоно. Ямар ч өрсөлдөгч гарч ирсэн Испани энэ тэмцээний турш үзүүлсэн тоглолтоороо дэлхийн аварга болох бүрэн боломжтой гэдгээ харууллаа. Залуу од Ламин Ямалын эрин үе эхэлж байгаа юу, эсвэл Испанийн алтан үе дахин мэндэлж байна уу гэсэн асуултын хариу финалын 90 минутад тодорхой болох гэж байна.

Л.Баяр