Өнөө шөнө дэлхийн хөлбөмбөгийн бүх анхаарал Нью-Йорк–Нью-Жерси цэнгэлдэхэд төвлөрнө. ДАШТ-ий аваргын төлөөх финалд Аргентин, Испанийн шигшээ багууд учраа таарч, дэлхийн цомын төлөөх хамгийн их хүлээлт дагуулсан тоглолтын нэгийг үзүүлнэ.
Аргентины хаалгыг туршлагатай Эмилиано Мартинес манана. Түүний өмнө Науэль Молина, Кристиан Ромеро, Лисандро Мартинес, Николас Тальяфико нарын хамгаалалтын шугам байрлана. Харин багийн тоглолтын хэмнэлийг Энцо Фернандес, Алексис Мак Аллистер, Леандро Паредес нар удирдах төлөвтэй.
Довтолгоонд Аргентины хамгийн том зэвсэг болох Лионель Месси гарна. Түүнтэй хамт Хулиан Альварес урд шугамд байрлаж, Аргентины довтолгооны гол ачааг үүрэхээр байна. Месси энэ тоглолтоор дэлхийн аваргын карьераа өндөрлүүлэх магадлалтай тул финалын оролцоо нь өөрөө хөлбөмбөгийн түүхэн үйл явдал болж байна. Тэр энэ тэмцээнд найман гоол, дөрвөн гоолын дамжуулалт бүртгүүлээд байгаа юм.
Харин Испанийн хаалганд Унай Симон зогсоно. Хамгаалалтын дөрвөлд Педро Порро, Пау Кубарси, Аймерик Лапорт, Марк Кукурелья нар тоглох төлөвтэй. Испанийн хамгаалалт энэ тэмцээнд онцгой найдвартай тоглож, финалд хүрэх замдаа ердөө нэг гоол алдсан нь тэдний хүчийг харуулна.
Төвийн шугамд Испанийн тоглолтын гол хөдөлгүүр Родри болон Фабиан Руис нар тоглоно. Тэдний өмнө Дани Олмо байрлаж, довтолгоог холбон тоглох үүрэг хүлээх төлөвтэй. Харин Испанийн довтолгооны гол анхаарал Ламин Ямал дээр төвлөрнө. 19 настай залуу од баруун жигүүрээс Аргентины хамгаалалтыг сэтлэхийг зорих бол түүнтэй хамт Микель Оярсабаль, Алекс Баэна нар довтолгоонд гарах хувилбар яригдаж байна. Ямал, Месси хоёрын насны зөрүү 20 жил боловч өнөө шөнө тэд нэг талбайд дэлхийн аваргын цомын төлөө өрсөлдөнө.
Энэ тоглолтод Аргентиныг Лионель Скалони, Испанийг Луис де ла Фуэнте удирдана. Нэг талд нь аваргаа хамгаалах зорилготой Аргентин, нөгөө талд нь 2010 оноос хойш дэлхийн цомыг дахин өргөхийг хүссэн Испани зогсоно. Испани энэ тэмцээнд 37 тоглолт дараалан ялагдаагүй цувралтай ирсэн бол Аргентин 2022 оны дэлхийн аваргын цомоо хамгаалах сүүлчийн алхмаа хийх гэж байна.
Месси юу, Ямал уу? Туршлага уу, залуу нас уу? Аваргын цом Аргентинд үлдэх үү, эсвэл Испанид очих уу? Хариу нь Монголын цагаар өнөө шөнө 03:00 цагт тодорно.
Л.Баяр
