Тулгар төрийн 2235, Их Монгол Улсын 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Ардчилсан хувьсгалын 36 жилийн ой, Үндэсний их баяр наадам өнгөрөв. Уг наадамд Улсын арслан Б.Орхонбаяр түрүүлж, Улсын заан Б.Бат-Өлзий үзүүрлэсэн. Үзэгч түмний дүгнэснээр жил жилийнхээс үзүүштэй, сайхан наадам болсон нь гарцаагүй. Тэгвэл баяр наадмаас хойш ямар барилдаанууд болж, хэн гэдэг бөх түрүүлэв?
Долдугаар сарын 13 - Уяачдын наадам
Дэлхийн адуун баяртай давхцуулан тэмдэглэсэн уяачдын баяр наадамд Сэлэнгэ аймгийн Хүдэр сумын харьяат Улсын начин Д.Төрболд түрүүлж, барилдах эрх нь даруй сэргээд байсан Өмнөговь аймгийн Ноён сумын харьяат Аймгийн хурц арслан М.Буяндэлгэр үзүүрлэсэн юм.
Долдугаар сарын 25 - Баянхонгор аймгийн 85 жилийн ой
Баянхонгор аймаг үүсгэн байгуулагдсаны түүхт 85 жилийн ойн барилдаанд Аймгийн арслан Ч.Алтангэрэл түрүүлж, Улсын үнэн зоригт харцага Н.Золбоо үзүүрлэжээ.
Долдугаар сарын 25 - Эрдэнэтийн 50 жил
Эрдэнэт хот байгуулагдсаны түүхт 50 жилийн ойн барилдаанд Архангай аймгийн Хайрхан сумын харьяат Улсын харцага О.Мөнх-Эрдэнэ түрүүлж, Архангай аймгийн Батцэнгэл сумын харьяат Улсын үнэн зоригт харцага Б.Зоригтбаатар үзүүрлэв.
Долдугаар сарын 27 - Тавантолгой ХК-ийн түүхт 60 жилийн ой
Өмнөговь аймгийн Цогтцэций сумын түүхт 102 жилийн ой, Тавантолгой ХК-ийн 60 жилийн ойд зориулсан хүчит бөхийн барилдаанд Улсын шинэ начин Б.Гончигсүрэн түрүүлж, Улсын аварга П.Бүрэнтөгс үзүүр булаасан.
Долдугаар сарын 28 - Улсын "Зүүн бүсийн хурд 2026"
Сүхбаатар аймаг байгуулагдсаны 84 жил, Зүүн бүсийн хурд-2026 баяр наадмын хүчит 128 бөхийн барилдаанд Сүхбаатар аймгийн Онгон сумын харьяат Улсын шинэ начин Б.Ночиндалай түрүүлж, Говьсүмбэр аймгийн Сүмбэр сумын хаяъяат, "Хилчин" спорт хороо, Тэс Сүмбэр ХХК, Шивээ Овоо ХК-ийн бөх, Монгол Улсын начин ЭНХТӨРИЙН МӨНХБААТАР үзүүрлэлээ. Энэ наадам тэдний Улсын начин цол хүртээд барилдаж байгаа анхны барилдаан гэдгээрээ онцлогтой байв.
Долдугаар сарын 30 - Үндэсний спортын наймдугаар их наадмын үндэсний бөхийн тойргийн барилдаан
Улсын цолтны барилдаанд Улсын начин Н.Амгаланбаатар 10 даваатай түрүүлж, Улсын начин Х.Наранбаяр 9 даваатай үзүүрлэжээ. Харин аймгийн цолтны барилдаанд Өвөрхангай аймгийн начин Д.Сумъяабазар 11 даваатай түрүүлж, Аймгийн арслан Б.Гончигтавхай 11 даваатай үзүүрлэв.
Долдугаар сарын 31 - Бөхбилэгт дэвжээний 30 жилийн ойн хүчит бөхийн барилдаан
Архангай аймгийн Бөхбилэгт бөхийн дэвжээний 30 жилийн ойн барилдаанд Улсын заан С.Сүхбат түрүүлж, Улсын үнэн зоригт харцага Б.Зоригтбаатар үзүүрлэв.
Долдугаар сарын 31 - Монгол улсын заан Даваасүрэнгийн Алтанцоожийн цолны мялаалга наадам
Өнөө жилийн улсын баяр наадмаар долоо давж, Улсын заан цолны болзол хангасан Хэнтий аймгийн Өмнөдэлгэр сумын харьяат Д.Алтанцоожийн мялаалга наадамд Улсын харцага Г.Бадрах түрүүлж, Цэргийн арслан Д.Цэрэнням үзүүрлэв.
Наймдугаар сарын 02 - Улсын цолтнуудад хүндэтгэл үзүүлэх барилдаан
Ховд аймгаас мэндэлсэн Улсын цолтнуудад хүндэтгэл үзүүлэх барилдаанд Ховд аймгийн Мөст сумын харьяат Аймгийн хурц арслан Ц.Төмөрцоож түрүүлж, Улсын заан Д.Анар үзүүрлэв. Ц.Төмөрцоож нь өмнөх өдрөө ХУРЦ чимэг нэмсэн юм.
Л.Баяр
