Монгол Улс 2026 онд Зүүн Азийн бүсийн волейболын аварга шалгаруулах тэмцээнийг эх орондоо зохион байгуулахаар болж, бүс нутгийн шилдэг багуудыг Улаанбаатарт хүлээн авах гэж байна. Зүүн Азийн Волейболын холбоо Улаанбаатар хотыг тус тэмцээнийг зохион байгуулах эрхтэй орноор сонгосон бөгөөд тэмцээн наймдугаар сарын 05-09-ний өдрүүдэд болно.

Улаанбаатар хот энэ тэмцээнийг өмнө нь дөрвөн удаа хүлээн авч байсан бол 2026 онд тав дахь удаагаа зохион байгуулагч орон болж байна.

Энэхүү тэмцээн анх 1998 онд Макао хотод зохион байгуулагдаж эхэлсэн бөгөөд түүнээс хойш Зүүн Азийн бүсийн волейболын хөгжлийн чухал талбар болж иржээ. Тэмцээний түүхэнд БНХАУ, Япон, БНСУ зэрэг Азийн волейболын хүчирхэг орнууд тогтмол оролцож, бүс нутгийн шилдгүүдээ тодруулсаар ирсэн байна. Монгол Улс анх 2000 онд тус тэмцээнийг эх орондоо зохион байгуулж байв. Тухайн үед Монголын эмэгтэй шигшээ баг амжилттай оролцож, мөнгөн медаль хүртсэн нь үндэсний волейболын түүхэн амжилтуудын нэг болсон юм. Харин 2008 онд Улаанбаатар дахин зохион байгуулагч болж, эмэгтэй шигшээ баг хүрэл медаль хүртэж байжээ. Үүний дараа Монгол Улс 2015, 2017 онд эрэгтэйчүүдийн Зүүн Азийн аваргыг дараалан хүлээн авч, бүс нутгийн волейболын томоохон төвүүдийн нэг гэдгээ харуулсан. 2015, 2017 оны тэмцээнүүдэд Монголын эрэгтэй шигшээ баг дөрөвдүгээр байрт шалгарч, Азийн хүчирхэг багуудтай өрсөлдөх чадвараа харуулсан юм.

Тэмцээн өмнө нь Макао, Хятадын Шанхай, Тайцан, Тайванийн Пинтун, БНСУ-ын Жэжү арал, Тайбэй, Хонконг зэрэг хотуудад зохион байгуулагдаж байсан түүхтэй. Харин 2026 онд дахин Улаанбаатар хотод болох нь Монголын волейболын хөгжил, олон улсын нэр хүндэд чухал үйл явдал болж байна.

Энэ удаагийн тэмцээн Монголын шигшээ багийн хувьд зөвхөн медалийн төлөөх өрсөлдөөн биш, харин Азийн шилдэг багуудтай тоглож туршлага хуримтлуулах том боломж юм. Япон, БНХАУ, БНСУ зэрэг дэлхийн хэмжээний волейболын сургалттай орнуудтай нэг талбайд тоглох нь залуу тамирчдын ур чадвар, өрсөлдөх чадварыг нэмэгдүүлэх чухал алхам болно.

Зүүн Азийн волейболын аварга шалгаруулах тэмцээн ийнхүү Монголын спортын түүхэнд дахин нэг том хуудас нээж, Улаанбаатар хотыг бүс нутгийн волейболын төвүүдийн нэг гэдгийг батлах үйл явдал болох гэж байна.

Азийн хүчирхэг багууд Монголд ирнэ

Зүүн Азийн бүсийн волейболын тэмцээнд   Эдгээрээс Япон, БНСУ, Хятад улс нь дэлхийн волейболын өндөр түвшний тоглолтын арга барил, хөгжлийн системээрээ ялгардаг.

Хятад улсын багууд Азийн хэмжээнд олон жил ноёрхож ирсэн бол Японы шигшээ хурд, хамгаалалт, техникийн нарийн тоглолтоороо алдартай. Харин Өмнөд Солонгос хүчтэй довтолгоо, багийн зохион байгуулалтаараа өрсөлдөгчдөд хүнд сорилт болдог. Монголын хувьд эдгээр багуудтай тоглох бүр нь туршлага хуримтлуулах, үндэсний шигшээ багийн түвшинг ахиулах чухал алхам болно.

Олон улсын томоохон тэмцээн Монголд зохион байгуулагдах нь спорт сонирхогчдод дэлхийн түвшний тоглолтыг эх орондоо үзэх боломж олгоно. Мөн залуу тамирчдад үлгэр дуурайл болох, хүүхэд залуусыг волейболын спортоор хичээллэхэд түлхэц өгөх ач холбогдолтой. Зүүн Азийн волейболын аварга шалгаруулах тэмцээн бол Монголын хувьд зөвхөн нэг удаагийн спортын арга хэмжээ биш. Харин Азийн волейболын газрын зурагт өөрийн байр суурийг бэхжүүлэх, үндэсний шигшээ багийн хөгжлийг шинэ шатанд гаргах стратегийн чухал боломж юм. 2026 оны наймдугаар сард Улаанбаатарын спортын талбайд Азийн шилдгүүд хүч үзэх бөгөөд Монголын волейболын түүхэнд шинэ хуудас нээгдэх гэж байна.

Л.Баяр