Аргентины хөлбөмбөгийн од Лионель Месси аав Хорхе Мессигээ таалал төгссөний дараа түүнд зориулан сэтгэл хөдөлгөм захидал бичиж, аавынхаа үхлийг хүлээн зөвшөөрөхөд маш хүнд байгаагаа илэрхийлжээ. Хорхе Месси наймдугаар сарын 7-нд 68 насандаа Аргентины Росарио хотод нас барсан юм. Тэрээр Лионель Мессигийн карьерын хамгийн чухал хүмүүсийн нэг төдийгүй олон жилийн турш хүүгийнхээ төлөөлөгчөөр ажиллаж ирсэн билээ.
Месси наймдугаар сарын 12-нд Instagram хуудсаараа дамжуулан аавдаа зориулсан захидлаа нийтэлсэн байна. “Ааваа, таныг байхгүй болсон гэдэгт би одоо ч итгэж чадахгүй байна. Энэ бүхэн бодит гэж сэтгэлд минь огт буухгүй байна. Би үүнийг хүлээн зөвшөөрөхийг хүсэхгүй байна” хэмээн Месси бичжээ. Тэрбээр мөн аав нь бага наснаас нь эхлэн хөлбөмбөгийн замналынх нь турш үргэлж дэргэд нь байсан тухай дурссан байна. Хорхе Месси ажлынхаа дараа хүүгээ бэлтгэлд хүргэж өгч, тоглолт бүрийг нь үзэж, амжилт гаргахад нь баярлаж, хүнд үед нь дэмждэг байжээ. Мөн Лионелийн тоглолтын талаар бусдын магтаалаас илүү шударга шүүмж хэлдэг хүн нь аав нь байсан гэдэг.
Месси 2026 оны дэлхийн аваргын үеэр аавынхаа эрүүл мэнд эрс муудсан тухай ч захидалдаа дурджээ. Хорхе Месси тэмцээн эхлэхээс хэдхэн хоногийн өмнө бие нь муудсан тул АНУ-д болсон ДАШТ-ийг хүүгийнхээ тоглолтыг газар дээр нь очиж үзэж чадаагүй.
Месси дэлхийн аваргад оролцох шийдвэрт аавынх нь хүсэл ихээхэн нөлөөлсөн гэжээ. Тэрбээр аавдаа дахин нэг дэлхийн аваргын финалд тоглож буйгаа харуулахыг хүссэн. Аргентин финалд Испанид ялагдсан ч аавынхаа хүслийг тэр биелүүлсэн юм. Месси мөн тэмцээний үеэр аавтайгаа ярилцахыг маш их хүсэж байснаа дурджээ. Ялангуяа тоглолтын дараа аав нь түүн рүү утасдаж, тоглолтын талаар ярилцдаг байсан нь түүнд маш их үгүйлэгдсэн байна.
“Би тангүйгээр яах аа мэдэхгүй байна. Хэрхэн цааш явахаа мэдэхгүй байна. Миний бүх амьдрал хөлбөмбөг тоглохтой холбоотой байсан. Харин одоо би ццашид тоглох эсэхдээ үнэхээр эргэлзэж байна” хэмээн Месси бичсэн байна. Энэ нь Месси хөлбөмбөгийн замналаа дуусгах талаар бодож байж болзошгүй гэсэн таамгийг улам хүчтэй болгожээ. Гэхдээ тэр зодог тайлах шийдвэр гаргаснаа мэдэгдээгүй бөгөөд одоогоор энэ нь гашуудлын үеийн сэтгэл хөдлөлөөс үүдсэн эргэлзээ гэдгийг онцлох нь зүйтэй.
Месси аавынхаа үлдээсэн үнэт зүйлсийг өөрийн хүүхдүүддээ өвлүүлэн үлдээхээ мөн хэлсэн байна. Хорхе Месси хүүгийнхээ мэргэжлийн замналын турш зөвлөгч, менежер, хамгийн ойрын дэмжигчдийн нэг байсан юм. Мессигийн захидлын дараа дэлхийн спортын олон алдартан түүнд эмгэнэл илэрхийлжээ. Түүний олон жилийн өрсөлдөгч Кристиано Роналду “Энэ хүнд хэцүү мөчид чамд болон гэр бүлийнхэнд чинь маш их хүч тэвчээр хүсье” хэмээн бичсэн байна.
Мөн Неймар, Лука Модрич, Карлос Алькарас зэрэг алдартнууд Мессид эмгэнэл илэрхийлжээ. Месси захидлаа аавдаа хайртайгаа илэрхийлж, түүнийгээ маш их санах болно гэдгээ хэлснээр төгсгөсөн байна.
Л.Баяр
