NBA лиг “Лос Анжелес Клипперс” баг Кавай Леонардад цалингийн дээд хязгаарыг тойрч, талбайн гадуурх нэмэлт орлого олох боломж бүрдүүлсэн гэх асуудлаар хийсэн мөрдөн шалгалтынхаа дүнг танилцуулж, багт түүхэн өндөр шийтгэл ногдууллаа. NBA-гийн шийдвэрээр “Клипперс” 2029-2033 оны таван нэгдүгээр тойргийн драфтын эрхээсээ тус бүр нэгийг алдах бөгөөд мөн 30 сая ам.долларын торгууль төлөхөөр болсон байна. Энэ нь NBA-ийн цалингийн дээд хязгаарыг тойрсон дүрэм зөрчсөнтэй холбоотой хамгийн хүнд шийтгэлүүдийн нэг болжээ.
Мөрдөн шалгалтыг Wachtell, Lipton, Rosen & Katz хуулийн фирм бие даан явуулсан байна. Шалгалтаар “Клипперс” Леонардтай холбоотой Aspiration Partners, Boingo Wireless, Daktronics болон Lockton Insurance гэсэн дөрвөн компанитай талбайн гадуурх орлогын гэрээ байгуулахад оролцсон гэж тогтоожээ.
Тэдгээрийн хамгийн их анхаарал татсан нь Aspiration компанитай байгуулсан 28 сая ам.долларын ивээн тэтгэх гэрээ байв. NBA-ийн дүгнэлтээр “Клипперс” тус компанид багийн бизнес олгох замаар Леонардтай гэрээ байгуулах нөхцөл бүрдүүлсэн бөгөөд энэ нь цалингийн дээд хязгаарыг тойрсон зохисгүй нөхөн олговор бий болгосон байна.
Багийн эзэн Стив Балмерийг NBA болон багтай холбоотой бүх үйл ажиллагаанд оролцох эрхээс нэг жилийн хугацаагаар түдгэлзүүлжээ. Лиг түүнийг Леонардад талбайн гадуурх орлого олох боломж бүрдүүлэхэд санаатайгаар тусалсан, Aspiration-тай холбоотой бизнесийн хэлцлийг зөвшөөрсөн гэж үзсэн байна.
Мөн “Клипперс”-ийн Бизнесийн үйл ажиллагаа хариуцсан ерөнхийлөгч Жиллиан Цукерийг нэг жил, Сагсан бөмбөгийн үйл ажиллагаа хариуцсан ерөнхийлөгч Лоуренс Фрэнкийг зургаан сарын хугацаагаар цалингүй түдгэлзүүлжээ. Багийг цаашид таван жилийн хугацаанд NBA-ийн хяналт, дагаж мөрдөлтийн хөтөлбөрт хамруулна.
Харин Кавай Леонард 700 мянган ам.долларын торгууль төлөх боловч тоглолтоос түдгэлзүүлэх шийтгэл хүлээсэнгүй. NBA түүнийг тухайн үеийн бизнесийн менежер Деннис Робертсоны үйлдлээр дамжуулан “Клипперс”-ээс нэмэлт орлого олох боломж эрэлхийлсэн, мөн багийн төлсөн зарим хувийн зардлыг буцаан төлөөгүй гэж үзжээ. Робертсоныг NBA-ийн багуудтай тоглогч, ажилтан болон бусад лигийн ажилтны нэрийн өмнөөс бизнесийн харилцаанд орох эрхийг таван жилээр хориглосон байна.
NBA болон Үндэсний сагсан бөмбөгчдийн холбоо эдгээр шийтгэлийг эцсийн бөгөөд заавал биелүүлэх шийдвэр гэж тохиролцсон байна. Харин “Клипперс” лигийн дүгнэлттэй санал нийлэхгүй байгаагаа илэрхийлж, шийтгэлийг арбитрын журмаар эсэргүүцэхээр төлөвлөжээ.
Л.Баяр
