Английн Премьер лигийн санхүүгийн дүрэмтэй холбоотой олон жилийн хэрэгт “Манчестер Сити” клубийг холбогдох бүх зөрчилд буруутай гэж бие даасан комисс тогтоосон талаар Премьер лиг мягмар гарагт мэдээллээ. Клубийг 2009-10–2017-18 оны улирлыг хамарсан хугацаанд санхүүгийн мэдээллээ үнэн зөв гаргаж өгөөгүй, зарим арилжааны гэрээг бодит тохиролцоог өөрөөр харуулсан “хиймэл” гэрээ хэлбэрээр байгуулсан, улмаар орлогоо зохиомлоор өсгөж, зардлаа бууруулсан гэж буруутгажээ.
Премьер лигийн мэдээлснээр, комисс “Манчестер Сити”-г арилжааны түншүүдтэйгээ бодит тохиролцоог буруу тусгасан гэрээ байгуулж, клубын орлогыг зохиомлоор нэмэгдүүлсэн гэж үзсэн байна. Мөн клуб санхүүгийн тайлангаа буруу мэдээлж, санхүүгийн бодит байдлаа аудиторууд болон зохицуулагч байгууллагуудаас нуусан гэж дүгнэжээ.
Хэргийг шалгасан комиссын баримтад дурдсанаар, тухайн хугацаанд “Манчестер Сити”-гийн орлогыг нийтдээ 830 сая фунт стерлингээс илүү хэмжээгээр хэтрүүлэн тусгасан гэж үзсэн байна. Мөн клуб 2013-14–2017-18 оны улирлуудад УЕФА-гийн санхүүгийн шударга тоглолтын дүрэм, 2015-16–2017-18 оны улирлуудад Премьер лигийн ашиг болон тогтвортой байдлын дүрмийг зөрчсөн гэж үзжээ.
Эдгээр зөрчил шалгагдаж байх хугацаанд “Манчестер Сити” дээрх бүх буруутгалыг тууштай няцааж ирсэн. Клуб мягмар гарагт гаргасан мэдэгдэлдээ давж заалдах боломжуудыг ашиглахаа илэрхийлж, өөрийгөө буруугүй гэж мэдэгдсэн байна. Одоогоор клубт ямар шийтгэл ногдуулах нь эцэслэн шийдэгдээгүй байна. Премьер лигийн дүрмийн дагуу оноо хасах, хязгааргүй хэмжээний торгууль ногдуулах, цаашлаад лигээс хасах хүртэл арга хэмжээ авах боломжтой.
Премьер лигийн гүйцэтгэх захирал Ричард Мастерс уг шийдвэрийг тус лигийн түүхэн дэх хамгийн чухал сахилгын хэргүүдийн нэг хэмээн тодорхойлж, дараагийн шатанд ямар шийтгэл ногдуулахыг шийдэх шаардлагатай байгааг онцолсон байна.
Энэ хэрэг 2023 онд “Манчестер Сити”-д албан ёсоор олон тооны зөрчлийн хэрэг үүсгэснээр олны анхаарлын төвд орсон бөгөөд мөрдөн шалгах ажиллагаа түүнээс өмнө дөрвөн жил гаруй үргэлжилсэн юм. Комисс 2024 оны арванхоёрдугаар сард 42 өдрийн сонсголыг дуусгасан байна. Хэргийг хамарсан хугацаанд “Манчестер Сити” гурван удаа Премьер лигийн аварга, гурван удаа Лигийн цомын аварга, нэг удаа Английн цомын эзэн болжээ.
Л.Баяр
