Португалын шигшээ багийн ахлагч Кристиано Роналду Дани улстай хийх Үндэстнүүдийн лигийн тоглолтын өмнө багийнхаа бэлтгэлийн баазыг орхижээ. Тэрбээр энэ шийдвэрээ шинэ дасгалжуулагч Жорже Жезусын хэвлэлийн бага хурлын дараа гаргасан байна.

Роналду есдүгээр сарын 30-нд олон нийтийн сүлжээгээрээ дамжуулан Португалын Хөлбөмбөгийн холбооны ерөнхийлөгч Педру Проэнсатай ярилцсаны дараа шигшээ багийн бэлтгэлийн баазыг орхихоор шийдсэнээ мэдэгджээ. Тэрбээр явах болсон шалтгаанаа одоогоор дэлгэрэнгүй тайлбарлаагүй бөгөөд “цаг нь болохоор” Португалын ард түмэнд үнэнийг хэлнэ гэж мэдэгдсэн байна.

Энэ үйл явдал Роналду Норвегийн эсрэг тоглолтод бүтэн тоглолтын турш сэлгээний суудалд суусантай холбоотой мэдээллүүдийн дараа гарчээ. Португалын шигшээ баг Норвегийг 2:1-ээр хожсон уг тоглолтын үеэр Роналду талбайд гараагүй байна. Үүний дараа тэрбээр багийнхаа хамтарсан бэлтгэлийн оронд биеийн тамирын зааланд тусдаа бэлтгэл хийжээ.

Шинэ дасгалжуулагч Жорже Жезус Дани улсын эсрэг тоглолтын үндсэн бүрэлдэхүүнд Роналдуг оруулахгүй гэдгээ хэвлэлийн хурлын үеэр мэдэгдсэн нь мөн түүний дээрх шийдвэрийнг шалтгаан гэгдэж байна. Гэхдээ Жезус Роналду хоёрын хооронд ноцтой зөрчил үүссэн гэх мэдээллийг үгүйсгэж, Роналду дасгалжуулагчийн гаргасан шийдвэрийг хүлээн зөвшөөрөхөд бэлэн байсан гэж хэлжээ.

Португалын Хөлбөмбөгийн холбоо Роналду бэлтгэлийн баазыг орхисныг баталсан бөгөөд үлдсэн 24 тоглогч Дани болон Норвегийн эсрэг хийх тоглолтуудын бэлтгэлээ үргэлжлүүлж байгааг мэдээлжээ.

41 настай Роналду Португалын шигшээ багийн түүхэн дэх хамгийн олон тоглолтод оролцсон, хамгийн олон гоол оруулсан тоглогч хэвээр байна. Тэрбээр шигшээ багийнхаа төлөө 234 тоглолтод оролцож, 146 гоол оруулжээ. Харин энэ удаагийн үйл явдал түүний шигшээ багийн ирээдүйтэй холбоотой шинэ асуултуудыг үүсгээд байна. Одоогоор Роналду шигшээ багаасаа зодог тайлж буйгаа албан ёсоор зарлаагүй байна.

Л.Баяр