"Royal International School"-н сурагчдаас бүрдсэн, Д.Отгонбаатар дасгалжуулагчтай, Д.Сод-Ирээдүй ахлагчтай Modun Wolves клубын U15 насны баг Азийн олон улсын тэмцээнүүдэд амжилттай оролцож байна.

Энэхүү баг 2025 оноос эхлэн олон улсын тэмцээнүүдэд тогтмол оролцож, Азийн улс орнуудын клуб болон дунд сургуулийн багуудтай өрсөлдөн, туршлага хуримтлуулж, амжилтаа ахиулсаар ирсэн. Тус баг 2026 онб 9-р сарын 25–27-ны өдрүүдэд БНХАУ-ын Шанхай хотод зохион байгуулагдсан UAA Under Armour Asia Club Championship 2026 тэмцээнд амжилттай оролцож, дэд аварга буюу мөнгөн медаль хүртлээ.

Тус тэмцээнд Азийн 13 бүс нутгийн 144 багийн 1,700 тоглогч оролцсон бөгөөд Монгол Улс оролцогч орнуудын нэгээр багтсан байна. Тэмцээнд Хятад, Өмнөд Солонгос, Япон, Хонконг, Тайвань, Монгол, Вьетнам, Филиппин, Сингапур, Малайз, Индонез, Тайланд, Австрали зэрэг улс, бүс нутгийн багууд өрсөлджээ. Modun Wolves U15 баг тэмцээний хагас шигшээ тоглолтод Бээжингийн их сургуулийн дунд сургуулийн баг болох PKUS-ийг хожиж, финалд шалгарсан байна.

Харин аваргын төлөөх тоглолтод Тайванийн багтай өрсөлдөн хожигдсоноор мөнгөн медаль хүртэж, дэд аварга болсон амжилтыг үзүүллээ. Ийнхүү Modun Wolves U15 баг UAA Under Armour Asia Club Championship тэмцээнд 2025 онд түрүүлж, алтан медаль хүртсэн амжилтаа 2026 онд мөнгөн медалиар үргэлжлүүлэн, хоёр жил дараалан тус тэмцээний медальт байрт шалгарлаа.

Мөн 2026 оны 2 дугаар сард БНХАУ-д зохион байгуулагдсан Samaranch Cup 2026 Masters Invitational Tournament буюу Мастеруудын урилгат тэмцээнд оролцож, мөнгөн медаль хүртсэн байна. Тус тэмцээний үеэр БНХАУ-ын чансааг тэргүүлж байсан өсвөрийн багийг хожсон амжилт гаргасан нь багийн хувьд онцлох тоглолтуудын нэг байлаа.

Олон улсын тэмцээнүүдэд үзүүлсэн амжилт - UAA Under Armour Asia Club Championship 2025 — Алтан медаль - Samaranch Cup 2026 Masters Invitational Tournament — Мөнгөн медаль - Asian Basketball Club Tournament (ABCT) Ansan 2026 — Дэд аварга, мөнгөн медаль - Asian Basketball Club Tournament (ABCT) Gangnam 2026 — Дэд аврашө мөнгөн медаль - UAA Under Armour Asia Club Championship 2026 — Дэд аварга, мөнгөн медаль Энэхүү баг нь Монгол Улсын U12, U13, U14, U15 насны ангилалд нийт дөрвөн удаа тасралтгүй улсын аварга болж, өсвөрийн сагсан бөмбөгийн салбарт амжилтаа батлан харуулсан билээ. Олон улсын тэмцээнүүдэд тогтмол оролцож, Азийн улс орнуудын клуб болон сургуулийн багуудтай өрсөлдөж байгаа нь тамирчдад ур чадвараа сорих, тоглолтын туршлага хуримтлуулах, цаашид улам хөгжих үнэ цэнтэй боломжийг олгож байна.

Цаашид багийн тамирчид бэлтгэл сургуулилтаа тасралтгүй үргэлжлүүлж, дотоодын болон олон улсын тэмцээнүүдэд амжилттай оролцон, Монголын өсвөрийн сагсан бөмбөгийн хөгжилд хувь нэмрээ оруулахын төлөө хичээн ажиллах болно.