The MongolZ баг Сербийн Белград хотод болж буй "1win Private Club Season 2" тэмцээний дээд хүснэгтийн хагас шигшээд Германы BIG багт 0:2-оор ялагдлаа. Ингэснээр манай баг тэмцээнийг шууд орхихгүй бөгөөд доод хүснэгтэд өрсөлдөж, цааш шалгарах боломжийнхоо төлөө тоглоно.

Өнгөрсөн шөнө болсон тоглолтод BIG баг Cache map-т 13:8, Mirage map-т 13:4-өөр хожиж, 2:0-ээр дуусгасан байна. The MongolZ map-т өрсөлдөгчийнхөө довтолгоог тогтоон барихад хүндрэлтэй байсан бол хоёр дахь map-т ч онооны зөрүүг ойртуулж чадсангүй.

The MongolZ баг Alliance-ийг 2:0-ээр хожсон ч BIG-д ялагдсанаар доод хүснэгтэд шилжлээ. Тэд өнөөдөр magic багтай тоглохоор хуваарьт оржээ. Энэ тоглолтод хожигдвол тэмцээнээ дуусгана.

Тэмцээн найман багийн бүрэлдэхүүнтэй, 100 мянган ам.долларын шагналын сантай бөгөөд 10 дугаар сарын 22-нд өндөрлөх хуваарьтай. The MongolZ-ийн хувьд одоо алдаа гаргах эрхгүй болж, доод хүснэгтийн тоглолтод ялалт байгуулах шаардлагатай байна.

Мөн тус багийн дараагийн томоохон тэмцээн болох "PGL Masters Bucharest 2026" аравдугаар сарын 24-нд эхэлнэ. Тиймээс Белград дахь тэмцээний үлдсэн тоглолтууд багийн шинэ бүрэлдэхүүний бэлтгэл, тоглолтын уялдааг шалгах чухал боломж байх нь гарцаагүй. 

Л.Баяр