Илон Маскийн сансрын технологийн SpaceX компани 2026 оны гуравдугаар улиралд 14.6 тэрбум ам.долларын орлого олж, 4.4 тэрбум ам.долларын цэвэр ашигтай ажиллав. Үүний зэрэгцээ Tesla компанитай нэгдэх боломжийг судлах тусгай хороод байгуулагдсан нь технологийн салбарын анхаарлыг татаж байна.
Илон Маскийн үүсгэн байгуулсан SpaceX компани 2026 оны долоодугаар сараас есдүгээр сарын хооронд 14.58 тэрбум ам.долларын орлого олсон нь өмнөх оны мөн үеэс 161 хувиар өссөн үзүүлэлт болжээ. Тус компани өмнөх оны мөн үед 1.1 тэрбум ам.долларын алдагдалтай ажиллаж байсан бол энэ удаа 4.4 тэрбум ам.долларын цэвэр ашигтай ажилласан байна.
Орлогын өсөлтөд хиймэл оюун ухаан (AI)-тай холбоотой бизнес болон хиймэл дагуулын интернэт үйлчилгээ голлон нөлөөлжээ. SpaceX-ийн хиймэл оюун ухааны чиглэлийн бизнесийн орлого гуравдугаар улиралд 7.56 тэрбум ам.долларт хүрсэн нь нийт орлогын талаас илүү хувийг бүрдүүлсэн байна. Харин Starlink хиймэл дагуулын интернэт үйлчилгээний орлого 5.25 тэрбум ам.доллар болжээ.
Энэхүү өсөлт нь SpaceX зөвхөн пуужин хөөргөх, сансрын тээврийн үйлчилгээ үзүүлэхээс гадна хиймэл оюун ухааны тооцоолол, үүлэн технологийн дэд бүтцийн томоохон нийлүүлэгч болон өргөжиж байгааг харуулж байна.
Санхүүгийн тайлангаа танилцуулах үеэр Илон Маск мөн өөрийн удирддаг цахилгаан автомашин үйлдвэрлэгч Tesla компанитай SpaceX-ийг нэгтгэх боломжийн талаар ярьжээ. Түүний мэдээлснээр, хоёр компанийн ТУЗ тус тусдаа хараат бус гишүүдээс бүрдсэн тусгай хороод байгуулж, боломжит нэгдлийн асуудлыг судалж эхэлсэн байна. Маск хоёр компанийг нэгтгэх санааг дэмжиж буйгаа илэрхийлсэн ч хэлэлцээр заавал хэрэгжинэ гэж үзэх нь эртэдсэн хэрэг болохыг онцолжээ. Одоогоор нэгдэх нөхцөл, хэлцлийн үнэ болон эцсийн шийдвэр гараагүй байна.
Хэрэв нэгдэл бодитоор хэрэгжвэл SpaceX-ийн сансрын тээвэр, Starlink хиймэл дагуулын сүлжээ болон хиймэл оюун ухааны дэд бүтэц Tesla-ийн цахилгаан автомашин, эрчим хүч хадгалах систем, роботын технологитой илүү нягт уялдах боломжтой. Гэхдээ ийм хэлцэл нь компанийн хувьцаа эзэмшигчдийн зөвшөөрөл болон холбогдох зохицуулалтын шаардлагыг давах ёстой.
Л.Баяр
