Аргентины хөлбөмбөгийн од Лионель Месси Испанийн хамгийн нэр хүндтэй шагналуудын нэг болох “Астурийн гүнжийн нэрэмжит спортын шагнал”-ыг хүртлээ. Тэрбээр энэ шагналыг спортын төрөлд бие даан хүртсэн анхны хөлбөмбөгчин болж байна.
2026 оны аравдугаар сарын 23-нд Испанийн Овьедо хотод болсон шагнал гардуулах ёслолын үеэр Месси шагналаа Астурийн гүнж Леонороос гардан авчээ. “Испанийн Нобелийн шагнал” хэмээн нэрлэгддэг уг шагналыг спортын амжилтаас гадна нийгэмд оруулсан хувь нэмрийг нь үнэлэн олгодог юм.
Шагналын шүүгчид Мессигийн олон жилийн турш тогтвортой үзүүлсэн гайхалтай амжилт, талбай дээрх үлгэр жишээ зан чанар, багаар ажиллах чадвар болон нийгмийн сайн үйлсэд оруулсан хувь нэмрийг онцлон тэмдэглэжээ. Тэрбээр эмзэг нөхцөлд амьдарч буй хүүхдүүдийн боловсрол, эрүүл мэндийн үйлчилгээний хүртээмжийг нэмэгдүүлэх чиглэлээр хүмүүнлэгийн ажил хийж ирсэн юм.
Месси мэргэжлийн замналынхаа ихэнх хугацааг Испанийн “Барселона” клубт өнгөрүүлж, тус багтайгаа Испанийн лигт 10, Аваргуудын лигт дөрвөн удаа түрүүлсэн. Мөн Аргентины шигшээ багийн бүрэлдэхүүнд 2022 оны Катарт болсон ДАШТ-д түрүүлж, “Алтан бөмбөг” шагналыг найман удаа хүртсэн билээ.
Өмнө нь Бразилын шигшээ баг 2002 онд, Испанийн шигшээ баг 2010 онд тус шагналыг хүртэж байв. Харин Испанийн алдарт хөлбөмбөгчид Икер Касильяс, Хави нар 2012 онд хамтдаа хүртсэн түүхтэй. Месси ийнхүү уг шагналыг ганцаараа хүртсэн анхны хөлбөмбөгчин боллоо.
Шагнал гардуулах ёслолын өмнө Месси Овьедо хотын 5000 гаруй хүүхэд, өсвөр үеийнхэнтэй уулзаж, спортод ялалт байгуулахаас гадна ялагдлыг зөв хүлээн авч сурах нь чухал болохыг онцолжээ. Тэрбээр зорилгодоо хүрсэн эсэхээс үл хамааран өөрийн чадах бүхнээ хийсэндээ сэтгэл хангалуун байх хэрэгтэй хэмээн хүүхдүүдэд зөвлөсөн байна.
Л.Баяр
