Өмнөх Засгийн газрын үед ЭБЭХ-ны яамны дэд сайдаар ажиллаж байсан Б.Ариунсанг Тагнуулын ерөнхий газрын даргаар томилсон нь сөрөг хүчин болсон МАН-ынхны ундууцлыг ихэд хүргэлээ. Хамтарсан Засгийн газрын үед ажлаа хийж чаддаггүй дэд сайд нар буюу “нялх Сэнгүм” нарын тоонд багтаж байсан түүнийг ийм том албанд томилсонд бухимдаж байна. Б.Ариунсан бол сайнаар биш харин муу талаараа иргэдэд танил болсон нэгэн. Тэрбээр жилийн өмнө хамтарсан Засгийн газар тарах гээд дэнжигнэж байх үед нь яамны сайддаа хэлэлгүй шатахууны үнийг нэмэх зөвшөөрлийг компаниудад өгсөн байдаг. Тиймээс АН-ынхан нь ч тэр, бусад намын гишүүд ч эсэргүүцэж ажлаас нь чөлөөлсөн түүх бий. Гэсэн ч жилийн дараа юу ч болоогүй юм шиг бүр эрх мэдэл бүхий албан тушаалд эргэн ирж буй нь хачирхалтай бас харамсалтай.

   Б.Ариунсанг Ерөнхий сайд Н.Алтанхуягийн хүн гэдэг. Угаасаа “Алтан гадас” фракцын угшилтай хүн гэдэг. Хоёрхон сарын өмнө Н.Алтанхуяг түүнийг Тагнуулын Ерөнхий газрын дэд даргаар томилоход Үндсэн хуулийн цэцийн шийдвэрээр ажлаас нь чөлөөлсөн. Иргэн Б.Ламжав Үндсэн хуулийн цэцэд хандаж “Б.Ариунсан гэгч мэргэжлийн бус хүнийг Тагнуулын ерөнхий газрын дэд даргаар томилсон нь Үндсэн хуульд заасан хэм хэмжээг зөрчиж байна” хэмээн гомдол мэдүүлснээр түүний ТЕГ-ын дэд даргын богинохон хугацаа хуулийн дагуу дууссан юм.
   Түүнийг ийнхүү мэргэжлийн биш хүн, дэд даргын албан тушаалд тохирохгүй гэж Үндсэн хуулийн цэц үзээд байхад Ерөнхий сайд Н.Алтанхуяг ТЕГ-ын даргаар томиллоо. Уг нь Тагнуулын Ерөнхий Газар гэдэг бол үндэсний аюулгүй байдлыг хангаж, хамгаалж байдаг газар. Гэтэл “Шатахууны үнийг нэмэх зөвшөөрөл өгөөгүй гэж жил гаруйн өмнө УИХ-ын гишүүдэд худал хэлж байсан түүнийг ийм чухал, онцгой албанд томилсонд МАН-ын гишүүд бухимджээ. Өмнө нь Н.Алтанхуягийн тус газрын дэд даргаар томилсон Ч.Чулуунбаатарыг ч мөн хууль зөрчсөн томилгоо хэмээн ажлаас нь чөлөөлсөн. Хамгийн нууц, ноцтой хэргүүдээ даатгаж байдаг манай Тагнуулын алба ийнхүү дарга нарын томилгоо, сэлгээнд ямар газар болж хувирах гээд байна вэ?

Өмнө нь иргэн Б.Ламжав түүнийг дэд сайдын ажилд тохирохгүй гээд заргаа авсан. Тэгвэл бүр томдсон албан тушаалд очоод буй түүний асуудлаар МАН-ынхан дахин Үндсэн хуулийн цэцэд хандахаар болоод байна. Дэд даргын ажилд тэнцэхгүй  гэж шийдчихээд даргын ажилд тэнцэнэ гэж үзвэл харин ч инээдтэй хэрэг болох биз ээ. Энэ бүхнийг Ерөнхий сайд Н.Алтанхуяг бодоогүй биш, бодсон баймаар.