Монголын урдаа барьдаг ганц хийлч Дээгий буюу Ч.Дэлгэрцэцэг өчигдөр “Монгол бахархлын өдөр”-өөр Улаанбаатар чуулгын гоцлол хөгжимчин болсон. Тэгвэл тэрээр тун удахгүй болох бие даасан зургаа дахь уран бүтээлийн тоглолтынхоо талаар өнөөдөр мэдээлэл хийлээ.Тэрээр энэхүү тоглолтоо нийслэлийн нүүр царай, соёлыг харуулсны дээр уянгын бус транс хөгжим оруулсан, үзэгчдийг уйдаахгүй шинэлэг тоглолт болно гэдгийг хэлж байсан юм. Түүнчлэн Дээгий тоглолтынхоо талаар “Сүүлийн үед Монголд цахилгаан хийл хөгжим дэлгэрч байгаа. Цахилгаан хийлээр ямар ч хөгжмийг тоглож болдог. Би цахилгаан хийл хөгжмөөр тоглоно. Тоглолтын эхэнд “Улаанбаатарын үдэш” дууг транс хэлбэрээр дуулна. Учир нь Улаанбаатар хот маань намуухан, уянгалаг биш, машин холхилдсон дуу чимээтэй, энд тэнд гэрэл анивчсан хот болжээ. Энэ хурдацтай өөрчлөлт хотын соёлыг олон улсад ч бас таниулах хэрэгтэй юм” гэжээ. Түүний тоглолт энэ сарын 30-нд болох бөгөөд Дээгий тоглолтынхоо дараагаар “Улаанбаатар чуулга”-ын уран бүтээлчидтэй хамт ОХУ-ын Эрхүү хотын драмын театрт тоглох аж.
