Өнгөрсөн жил манай улсад хар тамхитай холбоотой 34 хэрэгт 70 гаруй хүн холбогджээ. Сүүлийн 15 жилийн дотор хар тамхитай холбоотой гэмт хэрэг 3 дахин өссөн байна. Бусад гэмт хэргүүд жил ирэх тусам буурдаг бол  хар тамхи холбоотой гэмт хэргийн тоо өдрөөс өдөрт өсөн нэмэгдсээр байгаа юм.

Хар тамхитай холбоотой гэмт хэргийн 50 гаруй хувь нь монголд ургаж байгаа канабис буюу олсны ургамалтай холбоотой.  Сибирийн бүс нутагт эрчимтэй ургадаг Канабис өвс нь Сибирээс дамжан монголын Сэлэнгэ, Дархан-Уул, Төв аймгийн зарим хэсгээр ургадаг байна.  

Дэлхий даяар нийтлэг байдаг мансууруулах бодис агуулсан Канабис өвснөөс  "элс", "гашиш" зэрэг илүү хүчтэй мансууруулах бодисуудыг гаргаж авдаг бөгөөд энэ аргыг манай улсын мансуурагчид аль хэдийн эзэмшсэн гэдгийг албаныхан хэлдэг. Канабисийг хэрэглэсэн хүн хөгжилтэй, нөхөрсөг, залхуу болдог бөгөөд их хэмжээгээр олон удаа хэрэглэснээр аливаа зүйлд төвлөрч чадахгүй байхаас авахуулаад сэтгэл мэдрэлийн өвчтэй болох хүртэл олон хүндрэл үүсдэг аж.

Канабисыг хэрэглэхийг дэлхийн ихэнхи орнуудад хоридог. Манай улсад ч энэ хууль бус. Гэтэл энэхүү ургамалыг хууль бусаар түүж хэрэглэгчид олширсоор байгаа бөгөөд түүнийг устгах талаар ямар ч арга хэмжээ авахгүй байгааг хууль хяналтынхан онцолдог.

Цагдаагийн байгууллагаас  манай улсад хамгийн их ургадаг газар буюу Сэлэнгэ орчмын зэрлэг олсны ургамлыг устгая гэсэн саналыг яамандаа хүргүүлсэн боловч одоог хэр нь тодорхой хариу өгөөгүй байна.

Уг нь нэг га талбайд ургасан зэрлэг олсны ургамлыг устгахад 500 мянган төгрөг зарцуулдаг юм билээ. Тэгэхээр 10 мянган га талбайг цэвэрлэхэд нэг тэрбум төгрөг шаардагдана гэсэн үг.  Устгалыг ганц удаа хийгээд дуусдаггүй бөгөөд 3-4 жил дараалан устгал хийвэл дахин сэргэх боломжгүй болдог аж.
 
Үүнээс үзэхэд 3-4 тэрбум төгрөг зарцуулаад канабисээс айх аюулгүй болох боломж байгаа ч төр засаг үүнд анхаарахгүй байна. Энэ бол өвлийн ордон барих, хогны уут тараахын хажууд бага мөнгө.

Эцэст нь гэж хэлэхэд хүүхэд залуусыг хар тамхины хор хөнөөлөөс сэргийлэх ажилд мөнгө зарахгүй байна гэдэг Монголын төрд хар тамхитай тэмцэх бодлого алга гэдгийг батлаад өгч байгаа юм.