Буриадын алдартай зураач Зоригт Доржиевын үзэсгэлэн Лондоны “V&A Museum” буюу Виктория Альберт хоёрын мүзэйд гарав. “Тал нутгийн түүх” хэмээх нэртэй энэ үзэсгэлэнд З.Доржиевын 2005-2011 онд туурвисан 50 гаруй уран зураг, графикийн бүтээл, уран баримал тавигджээ. Мөн түүний номын чимэглэл, видео бүтээлүүд ч олны нүдийг хужирласан байна. Үзэсгэлэнгийн нээлтэд Тувагийн “Ятга” хамтлагийн ахлагч Альберт Кувезин үзэгчдэд хөөмийлж сонирхуулсанаас гадна зураач өөрөө гитарын импровизаци тоглосон бөгөөд буриад хувцасны үзүүлбэр болж, Лондоны ази хоолны алдартай “Samarquand” ресторанд бэлтгэсэн буриад хоолны амталгаа явагджээ.  
   Өнөө жил 35 настай З.Доржиев үүний өмнө Оросоос гадна Страсбург хот дахь Европын зөвлөлийн байр, Бээжингийн Олимпын хотхонд үзэсгэлэнгээ гаргаж байсан юм. Үзэсгэлэн бүрийнхээ танилцуулга дээр түүний бичдэг үг нэг. Тэр нь “Малч нүүдэлчин хүн гэдэг хэзээ ямагт хорвоогийн учир начрыг ухаж таньж явдаг. Нүүдэлчин гэдэг шинэ сэрэл мэдрэмж олж авах гэж явдаг жуулчин биш, аятай амьдрал хайн бэдрэх бядан явагч биш. Харин яруу найрагч, зураач, гүн ухаантан гэвэл илүү ононо. Морины нуруун дээр орь ганцаар яваа хүнд эргэцүүлэх, бясалгах нь амар байдаг. Ухаж таньсан, нээж мэдсэн зүйлээ хэнтэй хуваалцах вэ? Тал нутагт түүнийг нь  хуваалцах бас нэг нүүдэлчин хаа нэгтэйгээс гараад л ирдэг. Энэ удаа миний хувьд тэр хүн нь та боллоо” гэж бий.