Ирэх долоо хоногт нээлтээ хийх хөлбөмбөгийн аваргын тэмцээнийг эсэргүүцэж Бразилийн ажилтнууд “Arena Corinthians” цэнгэлдэх хүрээлэнгийн гадна тайван жагсаал хийжээ. Уг жагсаалд оролцсон 10 мянга гаруй хүн татвар төлөгчдийн мөнгийг хөлбөмбөгт биш зам тээвэр, эрүүл мэнд, боловсрол, хямд үнэтэй орон сууц барихад зарцуулах ёстой гэж үзэж байна. Тэд Сао Паулогийн цэнгэлдэх хүрэх замд байдаг хурдны замуудыг хааж, метрог шөнө дунд хүртэл бүсэлжээ. Жагсагчид тэмцлээ үргэлжлүүлж, метрог хаасан хэвээр байна гэж мэдэгдсэн байгаа ч тэмцээнд саад хийж чадахгүй нь бололтой. Дэлхийн аваргын тэмцээнийг үзэхээр 600-850 мянган гадаадын жуулчин ирнэ гэж тооцож байгаа бөгөөд тасалбар нь эрэлт ихтэй байна.