“Ралли Монголиа 2014” автомашин, мотоциклын холын зайн олон улсын уралдаан наймдугаар сарын 10-17-нд болно. Японы SSER байгууллага “Ямада” сан, Монголын автомашин, мотоциклийн спортын холбоотой хамтран, Монгол Улсад 20 дахь жилдээ зохион байгуулж байгаа уг уралдаан найм хоногийн хугацаанд 4000 орчим километр замд үргэлжилдэг.

Уралдаан энэ жилийн хувьд Говьсүмбэр, Өвөрхангай, Архангай аймгийн нутаг дэвсгэрт болно. “Ралли Монголиа” мотоциклийн олон улсын уралдааныг 1995 оноос хойш уламжлал болгон явуулахдаа ихэвчлэн говийн бүсэд голлон зохион байгуулж ирсэн. Монголын эрэгтэй тамирчид уг тэмцээнд идэвхтэй оролцож, мото ангилалд 10 удаа, авто ангилалд 8 удаа аваргын цом хүртэж байсан юм.

Харин эмэгтэйчүүдийн төрөлд голдуу гадны тамирчид өрсөлддөг байсан бол өнгөрсөн жилээс Монгол бүсгүйчүүд анх удаа өрсөлдөх болж, “Ралли Монголиа-2013” тэмцээний авто ангилалд Э.Янжмаа, мото ангилалд Х.Оюунтуяа, Ч.Батцэцэг нар оролцож байсан юм.