УИХ-ын чуулганы нэгдсэн хуралдаанаар Нийслэл хотын албан татварын тухай хуулийн төслийг хэлэлцлээ. Хэлэлцэж бус асуудалтай холбогдуулан гишүүд асуулт асууж, үг хэллээ. Харин маргааш өглөө санал хураахаар болж өнөөдрийн хуралдааныг өндөрлүүллээ.

Энэ хуултйн утга агуулга нь Улаанбаатар хотын хэмжээнд борлуулалтын үйл ажиллагаа эрхэлж байгаа аж ахуйн нэгж бүр 0-1 хүртэл хувийн татвар төлөх үүрэг хүлээхээр байгаад оршиж байгаа юм. Энэ нь шинэ төрлийн татвар билээ.

Хэлэлцэж буй асуудалтай холбоотойгоор Ж.Энхбаяр “Бүх төрлийн үйлчилгээнд нэг хувийн татвар суулгах нь үнийн өсөлт бий болгох нөлөөлөл болгоно. Нийслэлд татвар нэмэхдээ бүх үйлчилгээ, худалдаа гэлгүйгээр зарим шаардлагатай төрлөөр л татвартай болох хэрэгтэй” гэв. УИХ-ын дарга З.Энхболд үүнийг нь дэмжин “Тодорхой зорилттой татвар байхыг зөвшөөрч байна. Бүх үйлчилгээ, худалдаанаас биш тамхи, архины худалдаанаас ч гэдэг юм уу, тансаг хэрэглээнээс татвар авч болох юм” гэсэн байна.

Харин хотын дарга Э.Бат-Үүл “Бидэнд үйлчлүүлэгч хэрэгтэй байна гэдэг хүсэлтийг байнга тавих болсон тул жуулчдыг татаж доллар олох зорилго агуулж байна. Өнгөрсөн жил Монголд 200 мянган жуулчин ирсэн, энэ тоог бид 2 саяд хүргэх боломжтой хэмээн үзэж байна” гэсэн хариулт өгсөн нь олон гишүүнийг гайхашруулав.

Үүний хариуд УИХ-ын гишүүн С.Оюун “Үсчиний газар 1 хүртэл хувийн татвар төлөх болчихоод байхад та жуулчин татаж мөнгө олно гэж ярихаар ер ойлгогдохгүй байна. Ухаан маань хүрэхгүй би ойлгохгүй байна уу” гэсэн бол УИХ-ын гишүүн З.Баянсэлэнгэ “Э.Бат-Үүл дарга аа, жуулчин авчрахын тулд хууль санаачилсан гэж яриад байх, буруу хуулиа аваад ороод ирсэн юм биш үү. Хуулийн төслөө нэг хараадхаач. Бид бүгдээрээ тархи эргэчихээд байна” гэсэн юм.

Тэгвэл УИХ-ын гишүүн Ч.Хүрэлбаатар “Хэн хүнгүй толгой эргэж байна, төслөө татаж ав. 2015 оны шилдэг онигоо болно шүү. Улаанбаатар хотод 1 хувийн татвар нэмлээ, хөдөө орон нутагт дагуулаад нэмнэ. Үнийн өсөлтийг дэмжсэн хуулийг УИХ батлах юм уу” гэж байлаа.