Ромын хамба лам Францисыг Филиппиний нийслэл Манила хотод айлчлахад 6 сая сүсэгтэн үдэж гаргаж өгсөн билээ. 24 цаг үргэлжилсэн энэхүү арга хэмжээний үеэр Манила хотын замын цагдаа нар амсхийх ч завгүй ажиллажээ. Хотын гудамжин дахь зөөврийн бие засах газар хүрэлцээгүй байсан тул эргүүл, хамгаалалтанд гарсан 200 гаруй цагдаа нарт том хүний живх өмсгөхийг Манилагийн хөгжлийн төлөө газраас үүрэгджээ.

Хуран цугларсан хүмүүст үйлчлэх хүлээх үүрэг хүлээсэн цагдаа нарт бие засах газар урт дараалал үүсгэн зогсох зав олдоогүй тул ийм арга хэмжээ авахаас өөр аргагүй байжээ. “Замын цагдаа нараас нэг ч гомдол ирээгүй. Сүсэгтнүүдийн дунд гэлэнмаа, өндөр настнууд байсан учир тэднийг хүндэтгэх үүднээс ийм арга авлаа” гэж албаныхан тайлбарлав.

Филиппиний 100 сая хүн амын 80 хувь нь Ромын Католик шашинтай ажээ. Тиймээс 20 гаруй жилийн дараа Манилад айлчилсан хамба ламыг сүр дуулиантайгаар угтан авсан юм.