Улс орны эдийн засаг хямралтай, бүх шатандаа хэмнэлттэй байхад тэд тансаглалынхаа талаараа нууж хаалгүй мэдээлэл цацаж, твиттер хуудсаараа дамжуулан, ИТХ-ын дарга Г.Ганбаатар “Иргэдийн хурлаас миний зардлыг гаргасан” хэмээн хээв нэг хариулж сууна. Угтаа иргэдийн хурлаас гэдэг нь төрөөс буюу төсвөөс гарч буй зардал. Гэтэл ингэж зугаалж буйгаа тэрбээр юман чинээ бодохгүй байгаа бололтой, олон нийтийн сүлжээгээр зугаалж буй зургаа дэлгэн, хүний үзээгүйг үзэж яваагаа хэдэнтээ гайхуулаад авлаа. Энэ талаарх мэдээлэл намжаагүй байтал Дорноговийн ИТХ-ынхныг тус аймагт уран олборлодог Францын “Арева” компани өөрийн зардлаар зугаалуулж байгаа нь тодорхой болоод байна. 1997 оноос хойш манай улсад үйл ажиллагаа явуулж байгаа “Арева” компани Дорноговь аймгийн ИТХ-ын дарга Г.Ганбаатар тэргүүтэй албан тушаалтнуудыг Франц дахь компанийнхаа үйл ажиллагаатай танилцуулахаар урьсан нь энэ аж.

Харин зугаалгын бүрэлдэхүүнд тус аймгийн ИТХ-ын Ш.Эрдэнэбаяр, Ц.Гантулга, Ч.Энхбат, Азбаяр, Г.Баярсайхан, Т.Эрдэнэцэцэг, Б.Эрдэнэцэцэг гэх эрхмүүд багтаж байгаа юм байна. Хамгийн гол асуудал нь “Арева”-гийнхан Дорноговьд үйл ажиллагаа явуулж эхэлсэн цагаас тухайн орон нутагт ихээхэн хэмжээний хохирол учруулж байгаа бөгөөд өдгөө амьтан, хүнд ч хор хохирол учруулж байгаа талаарх иргэдийн гомдол тасардаггүй байна. Гэтэл монгол хүнд, тэдний амьдралд бодит хор, хохирол учруулсаар байгаа гадны компани юуны учир орон нутгийн удирдлагуудыг урьж залж, зугаалуулав гэдэг яах аргагүй анхаарал татах сэдэв. Мөнгөтэй, баян компани дарга нарыг урьж залсан ч улс орны эдийн засгийн байдал хүндхэн байгаа энэ үед тэдэнд татгалзах зориг байсангүй юу гэж асуумаар. Үгүй гэх нь ээ үнэхээр Франц дахь толгой компанитай нь танилцах зайлшгүй шаардлага гарсан бол техник, технологи хөгжсөн өнөө үед онлайнаар танилцаж болох байлаа.

 Харин зугаалж цэнгэхэд зориулах мөнгийг орон нутгийнхаа хөгжил, иргэдийнхээ амьдралд зарцуулах хувилбар уг нь тэдэнд байв. Гэвч тэгсэнгүй, хүссэнгүй иргэдийн амьдралыг бодохоос гадаадын орнуудаар зугаалж, цэнгэх нь тэдэнд илүү байсан бололтой. Цаашлаад эрхэм дарга нар ийнхүү гадагшаа зугаалснаар ашиг сонирхлын зөрчилтэй гэдгээ ил харуулах шиг. Адаглаад хүнээс юм авсан хүн эргээд хариу барих шаардлага гардаг. Байнга л иргэдийн эсэргүүцэлтэй нүүр тулж байдаг “Арева” компани тэдний амыг хаалгахыг өнөөх дарга нараас хүсвэл тэд ямар хариу барих вэ гэдэг сонин. Үнэндээ эрхэм дарга нар өнөөдөр биш ч маргааш ямар нэгэн лоббид өртөхгүй гэх баталгаа алга. Дорноговь аймагт бодит байдал дээр дарга нарын тансаглал, зугаалга цэнгүүн тоогоо алдсаныг хэлэх хүн цөөнгүй бий. Нутгийн иргэд нүд, чихгүй биш учраас дарга нарын тансаглалын талаарх мэдээллийг өгсөөр байгаа юм. Тухайлбал, аймгийн ИТХ-ын дарга Г.Ганбаатар Дорноговьд гэхээсээ гадаадад аялж явдгаараа бусдаасаа тасраад байгаа гэх. Үүнийг гэрчлэх мэт Америк, Герман, Франц, Итали, Солонгос гээд түүний аялж зугаалсан зургууд цахим орчинд ихээхэн түгээд байна.

Түүний хамгийн сүүлийн зугаалга өдгөө ч үргэлжилсээр. Дээр дурдсанчлан даргынхаа хамт ИТХ-ын төлөөлөгч болох Ш.Эрдэнэбаяр (эхнэрийн хамт), Ц.Гантулга, Ч.Энхбат, Азбаяр, Г.Баярсайхан, Т.Эрдэнэцэцэг, Б.Эрдэнэцэцэг нарын эрхмүүд Итали, Францаар зугаалж байгаа. Харин тэдний зугаалгын зардлын 50 орчим сая төгрөгийг ИТХ-аас гаргасан тухай цахим орчинд мэдээлэл гарсаар байгаа юм. Г.Ганбаатар дарга зугаалгынхаа зургийг нэгбүрчлэн фэйсбүүк болон твиттер хуудастаа оруулж байгаа бөгөөд ямар мөнгөөр юу хийж яваагаа эргэж ирээд мэдээлэхэд бэлэн гэдгээ ч илэрхийлээд байгаа. Эдийн засгийн хямрал иргэдийн нуруун дээр хүнд ачаа болсон энэ үед олон асуулт, эргэлзээ дагуулсан зугаалгынхаа талаар ирсэн хойноо дэлгэрэнгүй тайлагнана гэж найдъя. Эх орондоо ирэхэд амыг чинь асуух хүн олон бий шүү гэдгийг эрхэм аялагчдад энэ дашрамд сануулах юун.