Венесуэлийн ерөнхийлөгч Николас Мадуро улс оронд нь дахин эсэргүүцлийн жагсаал өрнөж, үймээн дэгдээсэнд АНУ-ыг буруутгаж байна. Мадурог засгийн эрхэнд гарсанаас хойш Венесуэлийн эдийн засаг огцом унаж, өргөн хэрэглээний бараа бүтээгдэхүүний үнэ өсчээ. Экспортын ашгийн 95 хувийг бүрдүүлдэг газрын тосны салбар хүндхэн байгаа нь үүнд нөлөөлсөн бололтой. Тиймээс Венесуэлийн хэдэн мянган оюутан залуус Николас Мадурог огцрохыг шаардаж байгаа юм. Гэтэл үүний цаана жагсагчдыг дэмжих замаар Венесуэлийн удирдагчдыг түлхэн унагаж, улам хямраах гэсэн нууц бодлогыг Америкчууд хэрэгжүүлээд эхэлсэн гэж Мадуро мэдэгдлээ. “Венесуэл дахь Америкийн дипломат ажилтнууд манай социалист удирдагчид болон олон нийтийн санаа бодолд нөлөөлж, төрийн эргэлтийг өдөөхөөр завдаж байна” хэмээн тэрээр ярьжээ.

Венесуэлд 2002 онд сөрөг хүчний удирдагчид шинэчлэлт шаардан, газрын тосны аж үйлдвэрийг хоёр сар зогсоож, төрийн эргэлт хийхээр оролдсон нь бүтэлгүйтсэн юм. Мөн 2014 онд Венесуэлийн нийслэл Каракаст хууль сахиулах хүчнийхэн болон Николас Мадурогийн Засгийн газрын эсрэг жагсагчдын хооронд мөргөлдөөн үүсч, олон хүний аминд хүрчээ.