УИХ дахь МАН-ын бүлгийн өчигдрийн ээлжит хуралдаанаар гишүүдийн санаачилсан Тэтгэвэр барьцаалсан зээлийн хүүг бууруулах зарим арга хэмжээний тухай УИХ-ын тогтоолын төслийг хэлэлцээд дэмжжээ. УИХ-ын гишүүн О.Содбилэгийн мэдээлснээр энэхүү тогтоолын төсөл нь ахмадуудын тэтгэврийн зээлийн хүүг сард 0.3-0.5 хувиар бууруулах зорилготой ажээ. Эдийн засгийн хямралд хамгийн их өртөж байгаа хүмүүс бол ахмад настнууд бөгөөд 2012 оны үетэй харьцуулахад тэтгэврийн зээлийн хэмжээ гурав дахин нэмэгдсэн байна. Ахмадууд сарын 1.5, жилийн 18 хувийн хүүтэй тэтгэврийн зээлийг арилжааны банкуудаас авдаг.

Нийгмийн даатгалын сангаас тэтгэвэр авч буй 328 мянган тэтгэвэр авагчдын 60 орчим хувь буюу 190 мянга нь өдгөө тэтгэврийн зээлтэй байгаа аж. Тэтгэврийн зээлийн үлдэгдэл болох 355 тэрбум төгрөгөөс хүү тооцож үзвэл ахмадууд сардаа 5.3 тэрбум, жилдээ 63.9 тэрбум төгрөгийн хүү төлж байна. Өөрөөр хэлбэл, нэг ахмад настанд дунджаар жилд 340 мянга, сард 30 орчим мянга төгрөг оногдож байгаа юм.

Нийгмийн даатгалын сангаас иргэдийн нийгмийн даатгалын шимтгэлийн хуримтлалыг арилжааны банкуудад 10.7 хувийн хүүтэйгээр хадгалуулж байна. Ахмадуудын тэтгэврийн зээлийн 18 хувийн хүү, банкинд хадгалуулсан хуримтлалын 10.7 хувийн хүү хоорондын зөрүү нь 7.3. Хүүний зөрүүтэй холбоотой асуудлыг зөвшилцөлд тулгуурлан зохицуулж чадвал ахмад настны тэтгэврийн зээлийн хүүний хэмжээг сард 0.3-0.5 хувиар бууруулах боломж бүрдэнэ гэж О.Содбилэг гишүүн мэдээллээ.