Украины зүүн хязгаарт 24 цагийн дотор 16 хүн алагдаж, нөхцөл байдал ширүүсч байгааг НҮБ сануулав. Донецк, Луганск мужуудад салан тусгаарлагчид болон Засгийн газрын цэргүүдийн хоорондох мөргөлдөөн үргэлжилсээр байна. Луганск мужийн хэд хэдэн тосгон, Дебальцево хот Засгийн газрын хяналтанд орсон гэж хэвлэлүүд мэдээлэв.

Автобусны буудал, нийтийн тээвэр, худалдааны төв, сургууль, цэцэрлэг, эмнэлэг тулааны талбар болж, энгийн иргэдийг золиослох нь ихэслээ. Тулааны бүс нутагт 5,2 сая хүн амьдарч байгаа нь санаа зовоосон асуудал болжээ. Өнгөрсөн дөрөвдүгээр сараас хойш 5350 хүн амиа алдаж, 12 мянган хүн шархадсан байна. Мөн 1,2 сая хүн орон гэрээсээ дүрвэжээ.

Салан тусгаарлагчдын удирдагч Александр Захарченкогийн мэдэгдсэнээр босогчид 100 мянган хүнээр хүчээ сэлбэх зорилготой байгаа гэнэ. Тэгвэл Украины Засгийн газар зэвсэгт хүчний бие бүрэлдэхүүнээ 200 мянгад хүргэнэ гэж төлөвлөжээ. Энэ хооронд АНУ Украинд зэр зэвсэг нийлүүлэхээ амласан юм.