Монголын Бизнесийн зөвлөл болон “Сео” клубын хүсэлтийн дагуу нийслэлийн Засаг дарга бөгөөд Улаанбаатар хотын Захирагч Э.Бат-Үүл цагдан хорих 461 дүгээр ангид хоригдож байгаа Канад улсын “Саусгоби сэндс” ХХК-ийн ажилтан болох Жастин Капла, Хилорион Кажуком, Кристобал Давид нартай өчигдөр уулзжээ. Тэд уулзалтаар юу ярилцсан нь одоогоор тодорхойгүй байна.

Тиймээс Монголын бизнесийн зөвлөлийн холбогдох албаны хүнээс уулзалтын талаар хийгээд Э.Бат-Үүл даргад чухам ямар санал хүсэлт илгээснийг тодруулахад “Манай байгууллагын зүгээс Э.Бат-Үүл дарга “Саусгоби сэндс” ХХК-ийн хуучин удирдлагуудтай холбоотой асуудлаар мэдэгдэл хүргүүлсэн. Энэ мэдэгдлийн дагуу очиж уулзсан байх. Бидний зүгээс уулзалтын талаар мэдэх зүйл алга. Уулзсан талаар өнөөдөр л сонсож байна” гэв.

Монголын Бизнесийн Зөвлөлөөс Саусгоби сэндс ХХК-ийн хуучин ажилтнуудад холбоотой хэргийн талаар доорх мэдэгдлийг Э.Бат-Үүлд илгээжээ

Мэдэгдэлд,

Монгол Улсын Татварын тухай хууль тогтоомжид тодорхой заасны дагуу татварын талаарх маргааныг иргэний журмаар шийдэх бүрэн боломжтой юм. Ийм боломж байсаар байтал Саусгоби сэндс ХХК-ийн ажилтан асан Жастин Капла, Хиларион Кажуком болон Кристобал Дэвид нарт холбогдох татварын хууль тогтоомжоос зайлсхийсэн гэх хэргийг эрүүгийн хэрэг болгон шийдэж холбогдогч нарт чанга дэглэмтэй хорих ангид 5 жил 6 сараас 5 жил 10 сар хүртэлх хугацаагаар хорих хатуу ял тус тус оноосонд Монголын Бизнесийн Зөвлөл тун харамсаж байна.

 Түүнчлэн уг хэргийг шүүх хурлын үеэр орчуулгатай холбоотой асуудал үүсэж байсан болон шүүгдэгчид шүүх хурлын үйл явцын орчуулгыг ойлгохгүй байгаа, өөрсдийн байр суурийг ойлгуулж чадахгүй байгаагаа илэрхийлсэн ч шүүх хурлыг үргэлжлүүлэн явуулж шийдвэр гаргасан талаар уг хэргийг шүүх хуралд  оролцсон гадаадын элчин сайдын яамдын төлөөлөгчдөөс  мэдэгдэл хийcэн байна. Монгол Улсад  шүүгдэж буй хэн ч байсан шударгаар шүүлгэх, шүүх үйл ажиллагаанд өөрийгөө бүрэн, үнэн зөв илэрхийлэх боломжоор хангагдах ёстой гэж МБЗ үзэж байна" гэжээ.