УИХ-ын чуулганы нэгдсэн хуралдаанаар Соёлын тухай хуульд нэмэлт оруулах тухай хуулийн төслийн анхны хэлэлцүүлгийг хийлээ.Хуулийн төсөлтэй холбогдуулан УИХ-ын гишүүн Ё.Отгонбаяр, “Энэхүү хуулийн төсөлд телевиүүдийн цагийн хуваарьт үндэсний нэвтрүүлгийн эзлэх хувийг заасан байна. Энэ бол төр хувийн хэвшлийн бизнест шууд оролцож байна гэсэн үг. Харин телевизүүдийн үндэсний нэвтрүүлгээ гаргасан цагийн хуваарь нь урамшуулал олгодог болох хэрэгтэй. Тиймээс энэ хуулий дэмжиж болохгүй” гэв.
Үндсэн хуулийн дагуу нэгэнт хэлэлцэх эсэх нь шийдэгдсэн хуулийн төслийг батлах ёстой учраас энэхүү хуулийн төслийг буцаан татаж болохгүй. Байнгын хороо болон ажлын хэсгээс хуулийн төсөлд шаардлагатай өөрчлөлтүүдийг оруулсан байна хэмээн УИХ-ын дарга З.Энхболд тайлбарлав.
Хэлэлцэж буй асуудалтай холбоотой асуулт асуух гишүүн байгаагүй тул Байнгын хорооноос гаргасан зарчмын зөрүүтэй зургаан саналаар тус бүрд нь санал хураалт явуулав.
Ийнхүү уг хуулийн төслийг эцсийн хэлэлцүүлэгт бэлтгүүлэхээр Нийгмийн бодлого, боловсрол, соёл шинжлэх ухааны байнгын хороонд шилжүүлэв.
