“Исламын улс” бүлэглэлийн хэт даврагчид өнгөрсөн наймдугаар сард Иракийн Язидис үндэстнүүдийг хоморголон устгаж, охид, эмэгтэйчүүдийг нь барьцаалан авсан юм. Хэт даврагчдаас айж эмээсэн Язидис үндэстнүүд Синжар ууланд бүгж байлаа. Энэхүү цус асгаруулсан тэмцлээс хойш 5000 Язидис эмэгтэйчүүд, хүүхдүүд өнөөдөр хэт даврагчдын барьцаанд амьдарч байна.

Тэднийг жихад дайчид удаа дараа хүчиндэж, хүчээр гэрлүүлэх, зодож нүдэх зэргээр тамлан зовоож байгааг хүний эрхийг хамгаалагчид шүүмжлэв. Тэр ч бүү хэл, онгон охидыг өндөр үнэ хүргэн зарж, Сирийн дайчдад “бэлэг” болгон өгдөг гэсэн мэдээлэл ч гарчээ.

Дайчдад хүчиндүүлэхгүйн тулд толгойныхоо алчуураар өөрийгөө боомилж, судсаа ханах зэргээр амиа хорлосон эмэгтэйчүүдийн тоо 100 хол давжээ. “Исламын улс” бүлэглэлийн хяналтанд орсон Мосул хотын эмнэлэгт амиа хорлохыг завдсан 10 настай охин хүргэгдэж ирсэн байна. Охиныг хүчиндэх гэж завдан үтрээг нь хатгаж, цоолсоноос бараг амиа алдах дөхжээ.