Аль-Кайда бүлэглэлийн салбарууд хөгжин цэцэглэсэн, Арабын хамгийн ядуу улс болох Йемений дотоод зөрчил туйлдаа хүрчээ. Олон сарын турш тэмцэл өрнүүлсэн шийт босогчид парламентыг тарааж, төрийн эрхийг гартаа авсан байна. Йемений шийт омгийн удирдагчид буюу Хоудигийн босогчид, сонгогдох эрхээ эдэлж чадаагүй суннит урсгалынхны хоорондын зөрчлийн улмаас үймээн самуун дэгджээ.

АНУ-тай дайсагналцдаг Хоудигийн босогчид хүчирхэгжсэн нь санаа зовоосон асуудал болоод байна. Хоудигийн босогчдыг дэмжигч олон нийт Сана хотын төв талбайд цугларч, төрийн эргэлт хийснийхээ баярыг тэмдэглэж байгаа ажээ. Тэд “Америк, Израйльчуудыг хөнөөж, Еврей нарыг хараан лалын шашны алдрыг мандуулна” гэсэн уриа барин жагсчээ. Ливаны шийт урсгалын Хезболла бүлэглэл мөн ийм уриатай гэнэ.