УИХ дахь АН-ын бүлгээс мэдээлэл хийлээ. Тус бүлэг өнөөдрийн хуралдаанаараа ЗГХЭГ-ын дарга С.Баярцогтыг огцруулах асуудлыг авч хэлэлцсэн байна. Түүнийг огцруулах хүсэлтийг Г.Уянга, С.Ганбаатар тэргүүтэй гишүүд өнгөрсөн долоо хоногт УИХ-ын даргад өргөн барьсан. Тэд С.Баярцогтыг “Эрдэнэс-Оюутолгой” компанид улсын төсвийн 17.5 тэрбум төгрөгөөр Америкийн нэгэн хуулийн компаниас зөвөлгөө авахуулах гэж байна гэж байна хэмээн буруутгаж байгаа юм. Тэгвэл тэдний хүсэлтийг АН-ын бүлэг хэлэлцээд С.Баярцогтыг огцруулах хангалттай үндэс байхгүй байгаагаас гадна түүнийг илт гүтгэсэн шинж чанартай мэдээллийг олон нийтэд цацсан байна гэж үзэж байгаа аж.

Энэ талаар тус бүлгийн дарга Б.Гарамгайбаатар ярихдаа “Төсвөөс гаргаж буй 17.5 тэрбум төгрөг нь эргэн төлөгдөх нөхцөлтэй байсан. Мөн С.Баярцогт ажлын хэсгийн ахлагч Б.Болорын хүсэлтээр гарын үсгээ зурсан. Огцруулахаар өргөн барьсан бичигт С.Баярцогт сайдыг гэрээ хийгээд мөнгө шилжүүлсэн байна гэж бичсэн байсан. С.Баярцогт сайд гэрээ хийдэг хүн биш. Эрдэнэс МЖЛ гэрээг хийдэг. Нөгөөтэйгүүр мөнгө бол шилжээгүй байгаа. Тиймээс үүнийг цэвэр гүтгэлэг гэж үзэж байна” гэв.

Гэхдээ уг асуудлыг байнгын хороо, УИХ-ын чуулганаар хэлэлцүүлэхээр болжээ.