МАН-ын байр болох Тусгаар тогтнолын ордонд дөнгөж сая МАН-ын ерөнхий нарийн бичгийн дарга Ж.Мөнхбат, УИХ-ын гишүүн, Сангийн сайд Ж.Эрдэнэбат, Хөдөлмөрийн сайд С.Чинзориг нар “Ард түмний индэр” нээлттэй мэдээллийг хийлээ. Тэд уулзалтын үеэр Ч.Сайханбилэг Ерөнхий сайдаар толгойлуулсан Шийдлийн засгийн газарт МАН хэрхэн хамтарч ажиллаж байгаа болон цаашид ямар зорилыг тавьж ажиллах талаар мэдээлэл хийлээ. Түүнчлэн уулзалтанд оролцож байгаа Засгийн газрын гишүүн сайд нар Засийн газрын үйл ажиллагааны бодлого, хэрэгжилтийн талаар болон нийгэм эдийн засгийн бодит байдлын асуудлыг мэдээлсэн юм.
     Уг хуралд нэлээдгүй олон тооны иргэд болон хэвлэл мэдээллийн хэрэгслүүд ирсэн байлаа. Хурлын үеэр МАН-ын Ерөнхий нарийн бичгийн дарга Ж.Мөнхбат хэлэхэдээ "Ардын намын сонгуульд ялагдсан хоёр тохиолдолд улс орны эдийн засаг дампуурлаа. Монгол Улс бол АН, МАН-ын улс биш. Харин бүх монголчуудын улс учраас бид ачааны хүндээс үүрэлцэхээр шийдэж засагт хамтарсан. Хамтарсан цагаас хойш олон удаа АН-ынхан ярьсан зүйлээсээ буцаж байна. Тийм учраас цаашдаа Ардчилсан нам энэ мэтээр зөвшилцөл, ойлголцол, хамтын гэрээнээсээ ухарч эхлэх юм бол Ардын нам бид бүхэн заавал энэ гэрээг биелүүлэх гэж заавал энэ ачааг үүрэлцэх гэж зүтгэхгүй гэдгийг хэлэх цаг болжээ. Өөрөөр хэлбэл хэлсэн үгэндээ эзэн, идсэн хоолондоо сав болох ёстой. Хэрэв ингэж чадахгүй бол МАН улс төрийн шийдвэр гаргаж болзошгүй"