Эх орноосоо зугтааж одоо ОХУ-ын нутагт амьдарч байгаа Виктор Януковичийг Украйнд буцааж өгөхгүй хэмээн ОХУ-ын тал мэдэгдлээ. Хэдхэн хоногийн өмнө экс ерөнхийлөгч болон түүний хүрээлэгчдийг эх оронд нь буцааж өгөх хүсэлтийг Украйны зүгээс тавьсан юм. Энэхүү хүсэлтэд ОХУ-ын Ерөнхий прокурор Чайка татгалзсан хариуг дамжуулсан байна.

Өнгөрсөн оны хоёрдугаар сард Украйнд эмх замбараагүй байдал үүссэний дараа экс ерөнхийлөгч Виктор Янукович болон ерөнхий сайд асан Николай Азаров, сангийн сайд асан Юрия Колобова нар ОХУ руу зугтаасан билээ. Украйны өнөөгийн эрх баригчид төрийн эрхийг барьж байхдаа эх орноосоо урвасан хэмээн үзэж буй дээрх хүмүүсийг буцаан авчирч зохих шийтгэл хүртээхийг зорьж байгаа аж.