2012 он буюу энэ онд аж үйлдвэржүүлэлт эрчимтэй өрнөнө. Монгол улс Засгийн газар, холбогдох төрийн байгууллагуудаас улсын хэмжээнд хамарсан их бүтээн байгуулалт, дэд бүтцийн ажлыг дараах байдлаар төлөвлөөд байна. Хэрвээ энэхүү ажлууд төлөвлөгдсөн хугацаанд, амжилттай хэрэгжвэл манай улс дунд хугацаанд буюу 2020 он гэхэд кокс, хар төмөрлөг, нүүрс хийжүүлэх, зэс хайлуулах, газрын тос боловсруулах, барилгын материалын үйлдвэртэй болох нь.
Үүнээс гадна 2013 онд Оюутолгойн зэсийн баяжмалыг үйлдвэрлэл эхэлж, 3000 орчим км төмөр зам тавигдаж, цахилгаан станц, нисэх онгоц буудал ашиглалтад орно.

•    Сайншандад “Коксын үйлдвэр”, “Хар төмөрлөгийн үйлдвэр”, “Нүүрс хийжүүлэх үйлдвэр, “Зэс хайлуулах үйлдвэр”, “Барилгын материалын үйлдвэр”, “Газрын тос боловсруулах үйлдвэр”-үүд, тэдгээрийн дэд бүтэц, инженерийн болон нийгмийн хангамжийг багтаасан хүнд аж үйлдвэрийн цогцолбор байгуулна.

•    Оюутолгойн зэс, алтны ордын ашиглалтыг 2012 онд эхлүүлж, 2013 оноос зэсийн баяжмалыг үйлдвэрлэж эхэлнэ.
 
•    Цагаан суваргын зэс, молибдены ордын олборлолтыг 2012 оноос эхлүүлж,  катодын зэсийн үйлдвэрийг 2013 оноос ашиглалтанд оруулна.

•    Тавантолгойн коксжих нүүрсний ордын Цанхийн хэсгийг 2011 оноос олборлон, экспортлож, 2013 онд нүүрс угаах, коксжих үйлдвэрийг ашиглалтад оруулна.


•    Дархан-Сэлэнгийн бүсэд байрлах Хустай, Баянгол, Төмөртэй, Төмөртолгойн төмрийн хүдрийн ордуудын ашиглана
•    Улаан, Цав, Халзан бүргэтэй зэрэг холимог металлын ордыг олборлож, Улаан, Цавын холимог металлын баяжмалыг боловсруулах үйлдвэрийг 2015 оноос барьж эхэлнэ.

•    Дархан, Чойбалсан хотод газрын тос боловсруулах үйлдвэрийг байгуулна.

•    Бороогийн хөндийд эм, био бэлдмэлийн, Дархан-Уул аймагт газар тариалангийн, Ховд аймагт хөдөө аж ахуйн биотехнологийн чиглэлийн, Дорнод аймагт цэвэр хүнс, биоматериалын шинжлэх ухаан технологийн паркуудыг, Шивээтийн хөндийд мэдээллийн технологи (Цахиурт хөндий)-ийн парк байгуулна.

•    Орон нутгийн шохойн ордуудыг ашиглан 1.0 сая тоннын хүчин чадалтай цементийн үйлдвэр 2-ийг, 100.0 мянган тоннын хүчин чадалтай цементийн үйлдвэр 3-ыг шинээр барина. Хөтөлийн цемент, шохойн үйлдвэрийн технологийн шинэчлэлийг хийж цементийн хэрэгцээг дотоодын үйлдвэрлэлээр хангана.

•    Өмнөд говийн өсөн нэмэгдэж буй эрчим хүчний хэрэгцээг хангах зорилгоор Тавантолгойн нүүрсний ордыг түшиглэн 300 МВ-аас доошгүй хүчин чадалтай Цахилгаан станц, Улаанбаатар-Мандалговь-Тавантолгой-Оюутолгойн 220 кВ-ын цахилгаан дамжуулах агаарын шугам, дэд станцыг барьж төвийн системтэй холбоно.

•    Азийн авто замын сүлжээнд холбогдсон АН-3, АН-4, АН-32 чиглэлийн 432 км хатуу хучилттай авто замыг барина.

•    Тавантолгой-Цагаансуварга-Сайншанд-Чойбалсан чиглэлийн 1100 км төмөр зам, Нарийнсухайт-Шивээхүрэн чиглэлийн 45.5 км, Ухаа худаг-Гашуунсухайт чиглэлийн 267 км төмөр замыг барьж, Хөөт-Тамсаг булаг-Нөмрөг чиглэлийн 380 км, Хөөт-Бичигт чиглэлийн 200 км төмөр замыг барина.

•    Төв аймгийн Хөшигийн хөндийд шинэ олон улсын нисэх буудал байгуулна.