Цагдаагийн байгууллагад энэ оны эхний 11 сарын байдлаар 259 хуурамч мөнгөн тэмдэгтийн талаар мэдээлэл иржээ. Энэ талаар өнөөдөр ЦЕГ, Монгол банктай хамтран иргэдэд сэрэмжлүүлэг гаргалаа.
Сүүлийн үед хуурамч мөнгөн тэмдэгтийг 35 хүртэлх насны компьютер, график, дизайн чиглэлийн мэргэжилтэй залуус бүлэглэж, хэвлэдэг болох нь тогтоогджээ. Тэд хуурамч мөнгөө шөнө оройн цагаар ТҮЦ, супермаркетуудаар гүйлгээнд оруулдаг байна.
Хуурамч мөнгөн тэмдэгтийг таних арга бол үрчийж хорчийсон байдаг аж. Арилжааны банкуудад хуурамч мөнгийг таних машин байдаг бол иргэд төдийлөн ялгаж мэддэггүйн улмаас хохирох болсон байна. Монгол төгрөгийн дэвсгэртэд 15 орчим нууцлал бүхий тэмдэг, ялтсууд байдаг аж.
Монгол банкны ерөнхийлөгч, Санхүүгийн зохицуулах хорооны дарга, Цагдаагийн ерөнхий газрын дарга нарын хамтран баталсан 2013 оны А-121/158/360 тоот тушаалаар “Гүйлгээнээс илэрсэн хуурамч мөнгөн тэмдэгтийг хүргүүлэх, бүртгэх, хадгалах, устгах” журмын дагуу улсын хэмжээнд Эрүүгийн цагдаагийн газрын Эдийн засгийн гэмт хэрэгтэй тэмцэх хэлтэст дээрхи санг бүрдүүлэн ажиллаж байна.
Хуурамч мөнгөн тэмдэгт үйлдэх гэмт хэргээс урьдчилан сэргийлэх чиглэлээр нийт 7845 ширхэг сэрэмжлүүлэг, зурагт хуудас тарааж, хуурамч мөнгөн тэмдэгтийг шалгаж авах талаарх зөвлөмжийг цагдаагийн байгууллагаас бэлэн мөнгөөр гүйлгээ хийдэг аж ахуй нэгж, байгууллага, иргэдэд зөвлөгөөг тогтмол өгч ажилласан байна. Хэрвээ Монгол улсын мөнгөн тэмдэгийг хуурамчаар үйлдвэрлэх юм бол Эрүүгийн хуулийн дагуу хариуцлага хүлээдэг аж. Эрүүгийн хуулийн 176 дугаар зүйлд Мөнгөн тэмдэгт, үнэт цаас, онцгой албан татварын тэмдгийг хуурамчаар үйлдэх, ашиглах, борлуулах тухай заасан байдаг.
176.1.Монгол Улсад төлбөр тооцооны хэрэгсэл болгон ашиглаж байгаа үндэсний болон гадаад улсын мөнгөн тэмдэгт, үнэт цаас, төлбөрийн бусад хэрэгсэл, онцгой албан татварын тэмдгийг хуурамчаар үйлдсэн, хуурамчаар үйлдсэнийг мэдсээр байж ашигласан, борлуулсан бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёроос таван жил хүртэл хугацаагаар хорих ял шийтгэнэ.
176.2.Энэ хэргийг давтан буюу бүлэглэж, урьд нь энэ хэрэгт шийтгүүлсэн этгээд үйлдсэн, түүнчлэн энэ хэргийн улмаас бусдад их хэмжээний хохирол учирсан бол эд хөрөнгийг хураах буюу хураахгүйгээр таваас дээш арван жил хүртэл хугацаагаар хорих ял шийтгэнэ.
176.3. Энэ хэргийг зохион байгуулалтай бүлэг, гэмт бүлэглэл үйлдсэн, түүнчлэн энэ хэргийн улмаас бусдад онц их хэмжээний хохирол учирсан бол эд хөрөнгийг хурааж арваас дээш арван таван жил хүртэл хорих ял шийтгэнэ гэж заажээ. Иймд хуурамч мөнгөн тэмдэгт илэрсэн тохиолдолд цагдаагийн байгууллага хандахыг ЦЕГ-аас мэдээллээ
