Францын баруун өмнөд хэсэгт гарсан ой хээрийн нүсэр түймрийн дараа олон арван жилийн турш газар дор булшлагдсан байсан Дэлхийн II дайны үеийн их хэмжээний тэсрэх бөмбөг, сум хэрэгсэл илэрч, оршин суугчдыг нутаг буцах ажиллагааг хойшлуулж байна.
Хамгийн их хохирол амссан Жиронд мужийн Ле Порж тосгонд галын улмаас олон зуун ширхэг идэвхитэй сум, их бууны сум, бусад байлдааны хэрэгсэл илэрчээ. Мэргэжилтнүүдийн мэдээлснээр, халууны улмаас зарим сум газар дээрээ дэлбэрсэн бөгөөд ойролцоох байшингуудын хананд хэлтэрхий туссан байна.
Одоогоор Францын тэсэрч дэлбэрэх хэрэгслийг устгах тусгай анги (EOD) газар дээр нь ажиллаж, эхний ээлжинд ил харагдаж буй сум, бөмбөгүүдийг цуглуулан аюулгүй болгож байна. Үүний дараа тухайн бүсэд илүү нарийвчилсан хайгуул хийж, хөрсөн доорх үлдсэн тэсрэх хэрэгслийг илрүүлэхээр төлөвлөжээ.
Энэ бүс нутаг нь Дэлхийн II дайны үед Германы эзлэн түрэмгийллийн үед цэргийн зориулалтаар ашиглагдаж байсан учраас олон төрлийн сум, зэвсэг үлдсэн байдаг аж. Гал түймэр хөрсийг эвдэж, ургамлыг шатааснаар эдгээр аюултай дайны хэрэгслүүд ил гарч ирэв.
Францын эрх баригчид оршин суугчдыг аюулгүй байдлыг бүрэн хангахаас өмнө гэртээ буцахгүй байхыг анхааруулжээ. Мэргэжилтнүүдийн хэлснээр, хэдэн арван жилийн өмнөх тэсрэх хэрэгслүүд ч өнөөдөр бүрэн ажиллагаатай хэвээр байх боломжтой бөгөөд багахан хөдөлгөөнөөр ч дэлбэрэх эрсдэлтэй байдаг гэнэ.
Энэ үйл явдал нь Францын түүхэн дэх хамгийн хүнд ой хээрийн түймрийн нэгтэй давхцаж байна. 2026 оны зуны урт хугацааны халалтын улмаас Франц, Испанид олон зуун мянган хүн нүүлгэн шилжүүлэгдэж, олон мянган га ой шатсан бөгөөд уур амьсгалын өөрчлөлт гал түймрийн эрсдэлийг улам нэмэгдүүлж байгааг мэргэжилтнүүд анхааруулж байна.
Л.Баяр
