Дуучин, жүжигчин Ариана Гранде өөрийн биеийн жин, гадаад төрхийн талаар олон нийтийн зүгээс тасралтгүй өрнөсөн шүүмжлэл, таамаглалын улмаас олон нийтийн амьдралаас түр хугацаанд холдохоор болсон талаар эх сурвалжууд мэдээлжээ. Грандегийн төлөөлөгчийн мэдээлснээр, тэрбээр "Eternal Sunshine" аялан тоглолтоо ирэх есдүгээр сарын 1-нд Лондон хотод өндөрлүүлсний дараа олон нийтийн өмнөх үйл ажиллагаагаа түр зогсоож, амралт авахаар төлөвлөж байна. Энэхүү шийдвэр нь түүний эрүүл мэндийн асуудлаас бус, харин сүүлийн саруудад нүүрлэсэн тасралтгүй хувийн амьдрал, биеийн галбиртай холбоотой хэлэлцүүлгээс үүдэлтэй аж.
Сүүлийн үед Грандегийн шинэхэн "Petal" дууны клип цацагдсаны дараа түүний туранхай харагдаж буй төрхийг олон нийтийн сүлжээгээр идэвхтэй хэлэлцэж эхэлсэн. Зарим фенүүд нь түүний эрүүл мэндэд санаа зовниж буйгаа илэрхийлсэн бол нөгөө хэсэг нь хүний биеийн талаар олон нийтээр дүгнэлт хийх нь зохисгүй хэмээн хамгаалсан байна.
Гранде өмнө нь ч ийм төрлийн шүүмжлэлд хариу өгч байсан. Тэрээр 2023, 2024 онд өгсөн ярилцлагууддаа хүмүүсийн "эрүүл харагдаж байсан" гэж ярьдаг үе нь үнэндээ өөрийнх нь хувьд бие болон сэтгэцийн эрүүл мэнд хамгийн муу байсан үе байсан гэж тайлбарлаж байв. Мөн бусдын биеийн жин, гадаад төрхийн талаар дүгнэлт хийх нь хэнд ч тус болдоггүй бөгөөд ийм яриа маш хор хөнөөлтэй гэж онцолж байсан юм.
Түүний ойрын эх сурвалжуудын мэдээлснээр Гранде аялан тоглолтоо өндөр түвшинд үргэлжлүүлж байгаа бөгөөд эрүүл мэндийн хувьд ноцтой асуудал байхгүй гэжээ. Харин олон нийтийн байнгын анхаарал, цахим орчны шүүмжлэлээс болж амралт авч, хувийн амьдралдаа төвлөрөх шаардлагатай болсон гэж тайлбарласан байна.
Үүнтэй холбоотойгоор тэрээр Лондонд тайзнаа тавигдах байсан Стивен Сондхаймын "Sunday in the Park with George" жүжгийн гол дүрээс мөн татгалзсан байна. Түүний төлөөлөгчийн хэлснээр энэхүү шийдвэр нь амрах хугацаандаа ажлын ачааллаа багасгах зорилготой холбоотой аж.
Фенүүдийн дунд түүнийг богино хугацааны завсарлага авсны дараа дахин уран бүтээлдээ эргэн ирнэ гэсэн хүлээлт өндөр байгаа бөгөөд одоогоор хэзээ эргэн олон нийтийн өмнө гарч ирэх талаар тодорхой тов гараагүй байна.
Л.Баяр
