
Венесуэлийн мэргэжлийн боксчин, дэлхийн гурван өөр жинд аваргын бүс хүртэж байсан Хорхе Линаресыг АНУ-ын Цагаачлал, гаалийн хяналтын алба (ICE) Техас мужийн Эль-Пасо хотод саатуулжээ. Тэрбээр арваннэгдүгээр сарын 15-ны ням гарагт саатуулагдсан бөгөөд энэ тухайгаа нийгмийн сүлжээнд мэдээлсэн байна.
41 настай Линарес X платформд “Намайг Техасын Эль-Пасо хотод ICE саатуулчихлаа. Ямар хачирхалтай нөхцөл байдал вэ” хэмээн бичжээ. АНУ-ын цагаачлалын албаны төлөөлөгч CNN-д мэдээлэхдээ Линаресыг Эль-Пасогийн олон улсын нисэх онгоцны буудалд Хилийн харуулын ажилтнууд болон ICE-ийн албан хаагчид саатуулсан гэв.
Тус байгууллагын тайлбараар Линарес 2023 оны аравдугаар сарын 26-нд АНУ-д түр хугацаагаар оршин суух зөвшөөрлөөр нэвтэрсэн боловч зөвшөөрөгдсөн хугацаагаа хэтрүүлэн үлдсэн аж. Иймээс түүнийг албадан гаргах ажиллагаа явагдах хүртэл цагдан хорихоор болсон байна.
Харин түүний өмгөөлөгчид үйлчлүүлэгчээ АНУ-д хууль ёсоор оршин суух эрхтэй бөгөөд цагаачлалын байгууллагын ажилтнуудтай бүрэн хамтран ажиллаж байгаа гэж мэдэгджээ. Тэд “Бид ICE болон Дотоодын аюулгүй байдлын яамтай холбоотой ажиллаж, энэ асуудлыг аль болох хурдан шийдвэрлэхээр хичээж байна. Цагаачлалын асуудал тодорхой журмын дагуу шийдвэрлэгддэг бөгөөд үүнд хугацаа шаардлагатай” хэмээн тайлбарласан байна.
Дэлхийн боксын холбооны (WBA) ерөнхийлөгч Хильберто Мендоса мөн Линаресыг саатуулагдсаныг баталж, түүний гэр бүлийнхэнтэй байнга холбоотой ажиллаж байгаагаа илэрхийлжээ. Хорхе Линарес 2002 онд мэргэжлийн бокст хөл тавьж, 21 жилийн турш рингэнд тулалдсан юм. Тэрбээр өдөн жин, супер өдөн жин, хөнгөн жингийн ангилалд дэлхийн аваргын цол хүртэж байв.
“Алтан хүү” хочтой Линарес 2007 онд анхны дэлхийн аваргын бүсээ хүртсэн бол 2014-2018 онд WBA болон WBC холбооны хөнгөн жингийн аварга болж байжээ. Тэрбээр 2023 онд Британийн боксчин Жек Кэттероллд ялагдсаны дараа зодог тайлсан. Мэргэжлийн карьерынхаа турш 56 тулаан хийж, 47 ялсны 29-ийг нь хүнд цохилтоор дуусгаж, есөн удаа ялагдсан амжилттайгаар спортоо орхисон байна. Одоогоор Линаресыг АНУ-аас албадан гаргах эсэх асуудлыг цагаачлалын журмын дагуу шийдвэрлэхээр ажиллаж байгаа аж.
Л.Баяр























































