АНУ-аас албадан гаргасан 100 гаруй венесуэл иргэн эх орондоо буцаж очсоныхоо дараахан болсон хүчтэй газар хөдлөлтийн үеэр сураггүй болсон талаар мэдээлжээ. АНУ-ын цагаачлалын албаны нислэгээр 146 венесуэл иргэн зургаадугаар сарын 24-нд Майами хотоос эх орон руугаа буцсан байна. Тэдний дунд 19 эмэгтэй, долоон хүүхэд байсан бөгөөд Венесуэлд очсоныхоо дараа Ла Гуайра мужийн зочид буудалд байрлуулжээ.
Гэвч тэднийг ирснээс хэдхэн цагийн дараа Венесуэлд 7.2 болон 7.5 магнитудын хүчтэй хоёр газар хөдлөлт болж, Ла Гуайра зэрэг бүс нутаг хамгийн их хохирол амссан байна. Тус гамшгийн улмаас 1700 гаруй хүн амиа алдсан гэж Венесуэлийн эрх баригчид мэдээлжээ.
Амьд үлдсэн хүмүүсийн ярьснаар, зочид буудал нурж, олон хүн нурангин дор дарагдсан байна. 58 настай Лисбет Портильо “би нурангин дороос гарч чадсан, дахин төрсөн мэт санагдсан” хэмээн ярьжээ. Тэрээр бусад амьд үлдсэн хүмүүсийн хамт тусламж хайж, хэдэн километр алхсаны эцэст холбоо тогтоох боломжтой болсон байна.
24 настай Женни Родригес мөн уг нислэгээр ирсэн бөгөөд газар хөдлөлтийн үеэр нурангин дор дарагдсан тухайгаа ярьжээ. Түүний хэлснээр, хамт нисэж ирсэн нэг хүн түүнийг аварсан байна.Энэхүү үйл явдал АНУ-ын Цагаачлал, гаалийн алба (ICE)-ны Венесуэлчүүдийг олноор нь албадан буцаах бодлогын дараах хамгийн эмзэг тохиолдлуудын нэг болж байна. АНУ 2025 оноос Венесуэл рүү албадан гаргах нислэгүүдээ дахин эхлүүлж, олон мянган хүнийг эх оронд нь буцаасан юм.
Сураггүй болсон хүмүүсийн ар гэрийнхэн хамаатан саднаа хайж, мэдээлэл авахыг оролдож байгаа ч холбоо харилцаа тасалдсан, аврах ажиллагаа удааширсан нь нөхцөл байдлыг улам хүндрүүлжээ. АНУ-ын Цагаачлалын алба уг асуудлаар мэдээлэл өгөөгүй байна.
Энэ хэрэг нь байгалийн гамшиг болон цагаачлалын хатуу бодлого давхацсан үед хүмүүсийн амь нас, аюулгүй байдал ямар эрсдэлтэй байж болохыг харуулсан үйл явдал болж байна.
Л.Баяр
