АН-ын даргын сунгаа нам гүмхэн өрнөж байсан ч сурталчилгааны хугацаа дундаа орохтой зэрэгцэн нэр дэвшигчид өөр өөрсдийн арга барилаар PR-аа хийж эхэлжээ. Өнгөрсөн сарын 21-нээс эхэлсэн сурталчилгаа 40 хоног үргэлжилж, энэ сарын 28-нд дуусна. Товчхондоо, нохойн дуу ойртох тусам багцалсан таван сум шиг эв түнжинтэй байна гэж нийслэлээс “хөтлөлцөөд” гарсан тэд нэгнийгээ намнасан өнгө аястай “мэдэгдлүүд” хийх болжээ. 

Таван нэр дэвшигчээс тэр, энэ өнгөлж байна гэх маягтай мэдээлэл олон нийтийн сүлжээгээр хүчтэй түгж эхэлсэн нь үүний нэг жишээ. Энэ нь тухайн нэр дэвшигчийн багаас гаргаж байгаа мэдээ гэдгийг ч АН-ын ерөнхий нарийн бичгийн даргын үүрэг гүйцэтгэгч Л.Эрхэмбаяр тойруу утгаар хэлчихсэн. Тэрээр “АН-ын зүгээс  нэр дэвшигчдийн үнэлгээ, дэмжигчдийн тоог гаргах ямар ч санал асуулга явуулаагүй” гэдгийг баталж байгаа юм. Үүнээс гадна уулзалт хийж буй газраасаа хамаараад нэр дэвшигчид нэг зүйлийг хоёр өөрөөр ярих, нэгнийгээ доош хийх гэх зэргээр сурталчилгаа ширүүсч байна. Тэр ч бүү хэл бүртгэлийн ажиллагаанд хөндлөнгийн нөлөө орсон гэдгийг эгэл жирийн гишүүд нь хэлж байна.

ХОЁР ХОНОГТ 100 МЯНГАН ГИШҮҮН ТАТВАРАА ТӨЛСНИЙ УЧИР

Дээр өгүүлсэн бүхнийг цахим ертөнцөд өрнөж буй “хов жив” гэж тооцвол жинхэнэ будлиан бүртгэл дээр хийгдэж байгаа гэнэ. Мэдээж будлианы эх үүсвэр нь таван нэр дэвшигч, тэдний ар талд байгаа багийнхан. Харин хэн нь АН-ын гишүүдийн шинэчилсэн бүртгэлийг будлиулсан бэ гэдэгт л баттай хариулт хэнд ч алга. Одоо тайлбарлая. 

Ардчилсан нам гишүүдээ шинэчлэн бүртгэх ажлыг арванхоёрдугаар сарын 8-нд эхлүүлж, энэ сарын 6-нд дуусгасан. Энэ хугацаанд буюу нэгдүгээр сарын 1-нд бүртгэлд 18 мянган хүн хамрагдаад байсан билээ. Улс орон даяар АН 180 мянган гишүүд дэмжигчидтэй гэсэн хэр нь 10 орчим хувь нь бүртгэлдээ хамрагдсан нь хангалтгүй, тэгээд ч “онигоо” болж дуусах нь бүртгэлийн хугацаагаа, бүр даргын сунгаагаа ч хойшлуулъя гэх саналыг УИХ-ын гишүүн асан Н.Батбаяр гаргаж байжээ.  

Гэтэл бүртгэл дуусахаас ердөө хоёрхон хоногийн өмнө дээрх тоо огцом өсч эхэлсэн юм. Тодруулбал, нэгдүгээр сарын 4-нд 40 мянга, 5-нд 97 мянга, 6-ны 12.00 цагийн байдлаар 116 мянга болж өсчээ. Улмаар нэгдүгээр сарын 6-ны 24.00 цаг гэхэд 176 мянган гишүүн шинэчилсэн бүртгэлд бүртгүүлсэн гэх мэдээллийг тус намын ерөнхий нарийн бичгийн даргын үүрэг гүйцэтгэгч Л.Эрхэмбаяр өглөө. Гишүүдийн тоо ийнхүү огцом өссөнд таван нэр дэвшигч тавуулаа гайхацгааж байгаа аж.

Тиймээс шинэчилсэн бүртгэлд хамрагдсан гишүүдийн нэрсийг тулгах саналыг тавуулаа гаргасан. Үүнээс хамгийн ноцтой зүйл нь дээрх 176 мянган гишүүн хэн яаж бүртгүүлсэн нь тодорхойгүй байгаа аж. Тэд энэ 176 мянга гэх тоог ХААН банкинд тушаасан нийт мөнгийг гишүүдийн жилийн татвар болох 1200 төгрөгт хувааж гаргаж иржээ. Тоглоомын тодорхой байгаа дүрмээр бол АН-ын шинэчилсэн бүртгэлд бүртгүүлэхийг хүссэн хүн бүр өөрийн регистрийн дугаараараа  ХААН банкинд 1200 төгрөг төлж бүртгүүлэх учиртай. Ингэж бүртгэхдээ мөнгө тушаалтыг бөөнөөр хийхгүй байхаар тохирсон гэх яриа ч бий. Гэтэл улс орон даяар хамгийн их очер дугаартай, ачаалал өндөртэй байдаг ХААН банкинд өдөртөө АН-д элсэхийн тулд 50, 50 мянгаараа хүн бүртгүүлнэ гэхээр “но” орчихсон гэх хардлага гараад байгаа аж. Товчхондоо, АН-д элсч байгаа болон өмнө нь гишүүн байсан хүмүүсийн дийлэнх нь шинэчилсэн бүртгэлд хамрагдах гэж банкинд дугаарлаж 1200 төгрөгөө төлөөгүй гэсэн үг. Одоо нийслэл, дүүрэг, хороо, 21 аймаг, суманд байгаа АН-ын үүрүүдэд биеэр очиж бүртгүүлсэн, ХААН банкинд орсон нийт мөнгө хоёрыг тулгах шаардлага үүсчээ. Мөн үүрүүд дээр оюутнууд мөнгө тушаасан баримтгүй өөрийн бичиг баримттайгаа бүртгүүлэх гэж их ирсэн байна. Мөнгө тушаасан баримтыг нь нэхэхэд “ХААН банкинд нэгдсэн журмаар тушаасан гэсэн” гэх хариулт өгч байжээ. 

Иймээс л бүртгэлийг хэн будлиулав гэх асуулт АН-ын дотоодод тавигдаад байгаа аж.