У.ХҮРЭЛСҮХИЙГ ЕРӨНХИЙ САЙД БОЛГОЖ БОЛОХГҮЙ 5 ШАЛТГААН

1. ДОН ЖУНАЙГ ХАДАРНА

М.Энхболд өөрийн хамаатан, шидэт дохиур Ж.Эрдэнэбатаараа дамжуулан хүссэнээрээ засгаар наадаж, загас мэт шарж буйг бид мэднэ. Нийгэм улс төр гадарладаг бор халзан төлөг ч мэднэ. Харин уул нурж, галав юүлэхээс наана юунд ч дийлдэхгүй гэгддэг “Дон” эзэн Т.Бадамжунай М.Энхболдоор дамжуулан Монгол төрийг уудлан самардагийг хүн бүхэн мэдэхгүй. Хэрэв У.Хүрэлсүх намын дарга, Ерөнхий сайд болчихвол шударга үнэнийг нөмөргөсөн Дон Жунайгийн сүлжээ хага үсэрч, зад ханзарна. Түүний зурсан гэгддэг газрын наймаагаар өнөөдрийн хот бухимдлаар түгжирч, өнөөгийн бид өр зүрхээ уур омгоор дүүргэсэн. Тийм зураг үргэлжилж хотын залуусын болздог пантамын газрыг хүртэл Эко констракшн (М.Энхболдыг багад нь Эко хэмээн дууддаг байсан бөгөөд энэ нэрээрээ үүсгэн байгуулсан, одоо ч хамааралтай компани гэгддэг) сая авчихлаа. Газрын наймаа гайтахын сургаар юунаас ч айдаггүй Дон Жунай У.Хүрэлсүхэд төмсөгөө хага базуулахаас айж, өнөөдөр магадгүй давсаг нь чинэрч байгаа. Ер нь түүний гар хөл болсон дээрэмчид бөмбөгөнөн өмдөндөө сарьж байгаа. Тиймээс хүний муу үзэж магадгүй хулигаан У.Хүрэлсүхийг одоо л дарах хэрэгтэй.

2. “МАК”-ЫН ДУСЛЫН СИСТЕМ ТАСАРНА

Ойрын хэдэн жилдээ төлж дуусахгүй их өртэй гэгддэг МАК компани улсын баялгыг уудлан секунд тутамд зарж өрөө төлж байгаа. “МАК”-ын өрийг залгуулж байгаа дуслын систем тасрахаас айсан МАК-ын хунтайж Н.Номтойбаяр “МАК”-ын засгийн газраас хамгийн түрүүлээд У.Хүрэлсүхрүү ноцоод эхлэв. Түүний мэдэлд очсон Монголын 3 дахь том алт, зэсний “Цаваан суварга”-ны орд, цаашлаад түүний сефинд байгаа гэгддэг стратегийн 300 гаруй лиценз сөхөгдөнө. Н.Номтойбаярын өөрийн гэр бүлдээ авсан конценс зовно. У.Хүрэлсүх Монголын засгийг байгуулах гэж байгаад “МАК”-ын засгийн амийг тасалчихаж мэднэ. Сүхийг одоо л булах хэрэгтэй.

3. ЗАСГИЙН ГАЗРЫН ГИШҮҮД БАЛАРНА

Тагнуулыг хувьдаа ашигладаг Ерөнхий сайдаас эхлээд таван толгой, Оюу толгойн мөнгийг удирдаж, алтны олон орд зарсан нь үнэн бол Ж.Мөнхбат баларна. Богд уулаас эхлээд борлуулж болох ариун газруудыг хужаа нарт зарж 13 тэрбумыг гулгуулсан нь үнэн бол Д.Оюунхорол баларна. Байгаль орчны загалмайлсан эх банзан гитар балбаж төрийн ордонд шоуддаг хөг нь өнгөрнө. Эмээж сандарсан А.Цогцэцэг эмнэлгүүдэд машин тараагаад эхэлсэн. Гэвч сонгуулийн өмнөх өдөр хүүхдийн мөнгө бөөнддөг шиг аргаа барсан арга гэдгийг гэнэн ч гэлээ тэнэг биш ард түмэн гадарлаж байгаа. Хөгжлийн банкны мөнгөөр хөл гараа угаасан нь үнэн бол баян Чойжоо бас баларна. Н.Төмөрхүү, Д.Ганбат нарын мутраар зурагдсан төрийн том тендерүүд сөхөгдөж мэднэ. Аядуу зөөлөн төрхөөрөө авилгын үнэнийг нуусан эзэн М.Энхболд нурна. Энгийн даруу төрхөөрөө М.Энхболдын үйлдлийг хаасан Ж.Эрдэнэбат уйлна. У.Хүрэлсүх төрийн сайдуудын өгзөгний махыг тас амбаардаж магадгүй. Яаж ч цавчиж, тэнэгтэж мэдэх учир түүнийг одоо л нухах хэрэгтэй.

4. АГЕНТЛАГИЙН ДАРГА НАР СУУЛТУУРТАА СУУЖ АМЖИЛГҮЙ СУМ ХАРВАНА

Хуулийг эрх мэдэлтний өмнө бөхийлгөсөн хууль хүчний дарга нарын өмнө хуулийн үнэ цэнийг мэдрүүлэх хүн бол тэр. Сохор хууль хараа орж магад. Байдал бишдэхийг мэдэрсэн тагнуулын Хурц гадаадруу гарч, бажга авсан дарга нар ичээндээ бэлдээд бужигнав бололтой. Женко өрөөндөө дуудаад “ИЛЧИЛ” гэж дарамтална. М.Энхболд гэртээ дуудаад “ДАЛДАЛ” аархана. Хаашаа ч хөдөлж чадахгүй халиуны зулзага АТГ дэрээ нэвширтэл уйлж байгаа. У.Хүрэлсүх үнэн шударгын тугаар толгойгоо боож босоод үеэр нь туг тахьчихаж магадгүй. Зангирсан хүч, зангидсан гараар хэнийг ч шаачихаж магадгүй. Сүхийн ирийг одоо л мохоох хэрэгтэй.

5. “ТЭРБУМ-60”-ЫГ ХАЛИАРУУД ЯЛНА

Төрийн албыг сүнгэнэтэл зарсан байж магадгүй “ТЭРБУМ-60” тогтолцоо нурна. Төрийг төгрөг мөнгөний талбар болгосон авилгын нэхээс хөвөрнө. Ц.Сандуй мэтийн бацаан байрнаасаа унаж шалгагдана. Баарандаа үлдвэл их юм. Шинэ Монголын хаад болох мөрөөдөлтэй “ТЭРБУМ-60” бүлэглэлийн дээр тэнгэр нурааж мэднэ. Ард түмнээ доромжилсон авилгын төлөвлөгөөнд нь өөрсдийг нь гинжилчихэж мэднэ. У.Хүрэлсүхийн зүрхэнд эх орон, ард түмнээ энэрэн хайрлах чанар байж магадгүй. Тиймээс тэд Топарын хөлийг одоо л таслах хэрэгтэй.

ЦАГ ҮЕ УДИРДАГЧИЙГ ТӨРҮҮЛЖ ИРСЭН ЮМ
ЦАДИГ ТҮҮХТ МОНГОЛ ЗОВСОН Ч, БУУЖ ӨГЧ ҮЗЭЭГҮЙ ЮМ.

Болдын ДАВАА