У.Хүрэлсүхийн Засгийн газар 100 дахь хоногтойгоо золголоо. Хийсэн ажил, төлөвлөсөн зүйл гээд бүх асуудлаа л ярьж, олон нийтэд танилцуулав. Чамгүй их ажил хийсэн байна. Ерөнхий сайд долоон шийдвэр гаргаж, чандлан мөрдөж хэрэгжүүлнэ гэнэ. Хамгийн гол нь гаргасан шийдвэртээ эргэн дүгнэлт хийж, алдаа гаргасан асуудалдаа засвар хийхээр болж байгаа юм. Өнгөрсөн хугацаанд өрнөсөн татварын нэмэгдэл, иргэдийн тэтгэвэрт гарах насыг уртасгах асуудал иргэдийг багагүй бухимдуулж, чирэгдүүлсэн явдал байв. Тэгвэл алдаа гаргалаа хэмээн үзээд бүхнийг эргүүлэн байранд нь тавихаар шийдвэрлэлээ. Бүр танхимын хурлаа ээлжит бусаар зарлан хуралдуулж асуудлыг шийдэхээр болсон юм.
Ийнхүү байгуулагдсанаасаа хойшхи ажлаа тайлагнаж, ард иргэдээ баахан бухимдуулсан шийдвэрээ эргэн харж дээр нь бэлэг болгон цалин хөлс нэмэх шийдвэр гаргалаа, У.Хүрэлсүх. Бухимдлын хариуд яахав дажгүй бэлэг л хүртэх шинжтэй. Гэхдээ санхүүгийн хямрал нүүрлэсэн, эдийн засгаа элгээр нь хэвтүүлж, эмнэлгийн сэхээний тасагт хүргэчихээд хэрхэн цалин нэмэх юм бол. Бас л өр зээл тавьж, асуудлыг шийднэ гэхгүй байгаа. Ер нь, У.Хүрэлсүхийн танхимынхнаас шийдвэртэй, эдийн засгаа, иргэдийнхээ амьжиргааг өөд татчих шийдэл гарна гэж ард түмэн хүлээж байгаа нь нууц биш. Тиймээс ч зоригтой, шийдвэртэй алхмуудыг хийх ёстой. Мөн гүйцэтгэх засаглалын танхим тийш зүглэх довтолгоог ч тэсвэрлэх нь зүйтэй. Элдэв төрлийн довтолгоо эхэлж, Засгийн газрыг доргиохоор оролдож байгаа цаг.
Үүний эхлэл болгон Хууль зүй дотоод хэргийн сайдыг намнах ажиллагаа хэдхэн хоногийн өмнөөс өрнөсөн. Цахим ертөнцийг байлдан дагуулж, олны нүдийг бүлтийлгэх тийм л зүйл хэрэгтэй байсан биз. Ц.Нямдоржид элдэв асуудал байхгүй. Нэр цэвэр улстөрч гэгддэг. Мөн танхимын хамгийн тулга, түшигтэй сайд гэдэг утгаараа түүнийг татан унагавал Засгийн газар тэр чигтээ ганхана гэсэн үг. Энэ ч утгаараа Ц.Нямдоржийг онилж, түүний суудлыг ганхуулах төлөвлөгөөг хэрэгжүүлж байгаа бололтой. Баалах, мяалах сэдэв олдохгүй байсан тул түүний эдэлж байгаа зүйлээр оролдох нь хамгийн зөв гаргалгаа болж хувирсан. Лексус моторсоос цоо шинэ тансаг зэрэглэлийн “Lexus 570” буюу “platinum signature” гэх загварын тэргийг тэрээр хөлөглөдөг. Үүнийг нь сошиалд тавьж, иргэдийн дургүйцлийг төрүүлэх үйл ажиллагааг өрнүүлсэн билээ. Ц.Нямдорж сайдыг намнах аян ийнхүү долоо хоногийн эхнээс явагдаж байх шиг.
Тэгвэл эдийн засаг нь сэхээнд хэвтчихсэн энэ улс оронд ганц автомашинаас том асуудалгүй болчихоо юу гэсэн зүйл бодогдох. Хүний эдэлдэггүй хорвоод байхгүй зүйл авсан мэтээр нийгэм даяараа жигшин зэвүүцэцгээх нь хэр оновчтой юм бол. Ер нь, төр засгаар оролдох, нийгэмд ийм хэмжээний доргион үүсгэхэд маш өндөр өртөг шаардагддаг гэдгийг улс төрийн хүрээнийхэн ярьдаг. Жагсаж тэмцдэг нөхдүүд ч гадарлана. Үүний цаана хэн нэгний ашиг сонирхол явж, маш их мөнгө цацсан тухай яриа ч байна. Бид өнөөдөр хэн нэгний хэрэглээ болсон автомашины тухай ярьж бухимдан, засаглалтайгаа тэмцэх бус харин улс орны эдийн засгаа бэхжүүлэх, асуудалд илүү анхаарвал дээрсэн. Томоохон төсөл хөтөлбөр, Тавантолгойгоо хөдөлгөж санхүүгийн асуудлаа зохицуулах, Оюутолгойн гэрээнд анхаарах, аж үйлдвэррийн парк байгуулан дотооддоо үйлдвэрлэлийг хөгжүүлэх гээд олон ажил бий. Энэ бүхнээ хий гэж шахахын оронд автомашины тухай яриад байгаа нь арай ч юм уу даа.
Бас нэгэн сонирхолтой асуудалд монголчууд огт бухимдахгүй явааг сошиал ертөнцөөр шагшрах. Төрт улсын тусгаар тогтнолыг харуулах нэг зүйл нь төв талбай. Гэтэл Сүхбаатарын талбайн зарим хэсгийг Худалдаа хөгжлийн банкны луйварчид тасдаж авчихсан сураг дуулдана. Ийм асуудлын талаар өнөө тэмцэгчид дуугарахгүй, нийгэмд ойлголт өгөхгүй байгаа нь ч хачирхалтай. Ер нь, төв талбайнхаа хэсгээс хувийн аж ахуйн нэгжид хуваан өглөө гэсэн мэдээлэл харж байсангүй. Ямартай нүүр номын хуудсаар тэнүүчлэх дээрх мэдээлэл үнэн бол харамсалтай хэрэг. Урд хойд хоёр хөршийнхөн Улаан талбай, Тянь Ан Миний талбайгаасаа тасдан хувааж хувьд шилжүүлсэн сураг өнөөг хүртэл алга. Өнөө ардчилал олон жил оршин тогтносон, хувийн бизнесийг дэмждэг АНУ ч ийм зүйл хийгээгүй яваа. Гэтэл Монгол Улс төв талбайгаа хувааж байгаа нь дэндүү сонирхолтой. Энэ мэт олон асуудлын талаар ярьж, тэмцэж болох атал Ц.Нямдорж сайдын машинтай тэмцэлдэн, жижгэрч явах нь дэндүү өрөвдөлтэй. Хэн нэгэн эрх мэдэлтний эрх ашгийн төлөө дуу хоолойгоо нэгтгэх бус эх орныхоо, ирээдүй хойчийн төлөө тэмцэж байвал тэр жинхэнэ тэмцэл.
Ийнхүү бичсэнээрээ эрхэм сайдыг өмөөрч байгаа хэрэг биш. Зөвхөн эх орныхоо төлөө тэмцэж, ирээдүйгээ цогцлоох, эдийн засгийн бат суурьтай болохын тулд дуу хоолойгоо нэгтгэдэг байя гэж л хэлэх гэсэн юм. За ямартай ч нэг хүн, нэг машин хоёрын асуудалд анхаарахаас илүүтэй мартагдах дөхөж байгаа утааны асуудлаа ч бас бодох хэрэгтэй биз ээ.
Э.Мөнгөнбаяр
Сэтгэгдэл (27)