МУИС-ийн номын сан анх 1942 онд байгуулагдаж байжээ. Харин 2017 оны намраас эхлэн орчин үеийн дизайны шийдэл бүхий ая тухтай орчинг бүрдүүлсэн номын сангийн шинэ байранд үйл ажиллагаагаа явуулж эхэлсэн юм. Одоогийн байдлаар 360 мянга гаруй хэвлэмэл болон цахим сан хөмрөгтэй, олон улсын онлайн мэдээллийн сангуудыг ашиглах боломжийг бүрдүүлэн 52 ажилтан, 15 цэг салбараар үйлчилгээ үзүүлж байна. 1000 орчим CD, 20 орчим цахим ном, 2400 орчим E магистрын ажил, 16 нэр төрлийн олон улсын онлайн мэдээллийн сангууд ажиллах боломжтой Е уншлагын танхимтай. Мөн номын сангийн бүх мэдээллийг авах нэг цэгийн үйлчилгээтэй аж. Сүүлийн үеийн тоног төхөөрөмж бүхий иж бүрэн тохижилттой “Ном сэргээн засварлах лаборатори” ажилладаг юм байна. Харин олон хувьтай номыг 1-3 хоногоор оюутнуудад гэрээр олгодог байна. Олон мянган оюутны хүсэн хүлээсэн цоо шинэ номын сан дотроо хичээлийн анги танхим, лаборатори, музей, кафе, номын дэлгүүр, уншлагын танхим, амралтын хэсэг, дэлгүүр гээд оюутнуудад хэрэгтэй бүх зүйлийг дотроо багтаажээ. Ингээд МУИС-ийн номын сангийн захирал Г.Цэрэн /PhD, дэд профессор/-тэй ярилцсанаа хүргэж байна. 

 

- Монголийн хамгийн том номын сан баригдаад багагүй хугацаа өнгөрлөө. Энэ хугацаанд хичнээн оюутан номын сангаар үйлчлүүлсэн бэ?

 

- 2017 оны аравдугаар сарын 5-нд шинэ номын сангийнхаа нээлтийг хийсэн. Энэ том барилга тэр чигтээ номын сан биш. Баруун жигүүрийн 1- 4 давхар нь номын сан байрлаж байна. Номын сан дотроо 700 суудалтай. Гэхдээ хүүхдүүд орж ирээд чөлөөт орчинд үйлчлүүлэх боломжтой. Тийм учраас яг чөлөөт орчинд хэдэн хүн суусан гэдэг тоог хараахан гаргаагүй байна. Нээлт болсноос хойш манай номын сан өдөр болгон 700 суудал нь дүүрэн ачаалалтай ажилласан. 

 

 

- МУИС-ийн номын санд өөр сургуулийн оюутнууд үйлчлүүлэх боломжтой юу?

 

- МУИС 25 мянга гаруй оюутантай. Тийм учраас ачааллаа дийлэхгүй байна. Гэхдээ гадны үйлчлүүлэгчид маш их ирж байгаа. Бид нар журмаараа өдөрт 15 хүнд үйлчлэх квот тогтоосон. 

 

- МУИС-ийн номын сан хэдэн ажилтантай ажиллаж байгаа вэ? 

 

- Манай номын сан 52 ажилтантай. 

 

- Хичнээн тооны том товхимолтой байгаа вэ?

 

- Бид нар жилээс жилд номнуудаа баяжуулж байна. Одоогийн байдлаар 400 мянгаад номтой байгаа. 

 

- Номын сандаа бүрэн автоматжуулалтын RFID технологийг нэвтрүүлэхээр ажиллаж байгаа гэсэн. Энэ ажил нь хэдэн хувьтай явж байгаа вэ?

 

- Монголын номын сан дэлхийн түвшинд хүрэхийн тулд автоматжих хэрэгтэй байна. Үүнтэй холбоотойгоор RFID технологийг нэвтрүүлэхээр ажиллаж байна. 

 

 

- Цаашдаа ямар ямар ажилууд хийхээр төлөвлөж ажиллаж байгаа вэ?

 

- RFID технологи номын санд нэвтрээд ирэхээр бид нар бүх систем, программаа өөрчлөнө. Үүнийг дагаад маш их ажлууд хийгдэнэ. Хоёрдугаарт номын санчдынхаа хөгжил, боловсрол, хүний нөөц дээр анхаарах хэрэгтэй байгаа. Номын санчдад зориулсан шаталсан сургалт явуулах ажил дээр түлхүү анхаарна гэж бодож байгаа. Яагаад вэ гэхээр номын сан программынхаа хувьд ч олон зүйл дээр хөгжөөд ирэхээр дотор нь ажиллаж байгаа хүмүүс өөрсдөө харилцааны ч юм уу ямар нэгэн доголдол гаргавал бидний хийсэн ажил нурна гэсэн үг юм. Тийм учраас энэ тал дээр ойрын хугацаанд түлхүү анхаарч ажиллана. 

 

 

МУИС-ийн "Brand Shop" дэлгүүр: 500- 130 мянган төгрөг хүртэлх үнэтэй бараа зарагддаг

 

МУИС-ийн номын сангийн нэг давхарт байрлах оюутнуудад зориулсан дэлгүүрээр орж сонирхолоо. Энд оюутан залуусд зориулсан бүхий л бараа бүтээгдэхүүнүүд худалдаалагддаг аж. 

 

 

- Номын сан нээгдсэнээс хойш үйл ажиллагаагаа явуулж байгаа юу?

 

- Тийн. Номын сан нээгдсэнээс хойш үйл ажиллагаагаа явуулж байгаа. 

-

Оюутнууд ихэвчлэн ямар бараа сонирхож авч байна вэ?

 

- Өдөр тутмын хэрэглээ болсон дэвтэр, усны сав, энгэрийн тэмдэг, үзэг, бал гэх зэрэг зүйлсийг их авдаг. 

 

 

- Бараанууд нь хэдээс хэдэн төгрөгийн хооронд байдаг вэ?

 

- Бараануудын хувьд бусад газруудыг бодвол харьцангуй хямд үнэтэй байдаг. Ер нь 500-аас 130 мянган төгрөг хүртэл үнэтэй бараа байдаг. 130 мянга гэхээр гайхаж байж магадгүй. Энэ бараа нь бэлэг дурсгалын зүйлс байдаг. Энэ барааг гадаад оюутнууд болон гадаад явах гэж байгаа хүмүүс авдаг байгаа. 

 

 

МУИС-ийн оюутнуудад илүү хөнгөлөлттэй үнээр ном худалддаг

 

МУИС-ийн номын сан дотор оюутнуудын хичээл хэрэглэгддэг бүхий л мэргэжлийн суралцагчдад зориулсан номыг худалдаалдаг юм байна. 

 

 

- Танайд ямар ямар номнууд худалдаалагдаж байгаа вэ? 

 

- Их сургуулийнхаа багш нарын номыг хөнгөлөлттэй үнээр хэвлээд МУИС-д сурдаг оюутнуудад SISI програмаар нэвтэрдэг кодыг нь бүртгэж аваад хямдралтай үнээр худалддаг. Номнууд 2 өөр төрлийн үнэтэй гардаг. МУИС-ын оюутан биш хүсүүст өөр үнээр худалддаг. Өөр сургуулийн багш нар танай сургуулийн харъяа номын дэлгүүрт номоо өгч заруулмаар байна гэсэн хүсэлтийн дагуу өөр номнууд ирж байгаа. Оюутнуудад хэрэглэгддэг номнуудыг дэлгүүртээ тавьж худалдаж байгаа. Эдгээр номнууд нь бусад номын дэлгүүрүүдтэй харьцуулахад 15- 20 хувийн хямдралтай байгаа. Яагаад гэхээр хувийнх биш улсын гэж явдаг учраас. Их сургуулийн хэвлэлийн компаниар хэвлүүлсэн номнууд дийлэнх хувийг хувийг эзэлж байна. Тэтгэвэртэй гарсан багш нар, судлаач эрдэмтдын номнууд байгаа.