Элэгний “Эссенциале форте Н” эмийн капсул хоосон байсан гэв үү
Түгээх
2018-03-13 08:12:13 - Эрүүл мэнд
ОХУ-ын “Sanofi” компанийн үйлдвэрлэдэг “Эссенциале форте Н” гэх элэгний эм хуурамч байж болзошгүй байна гэх мэдээллийг нэгэн бүсгүй нийгмийн сүлжээнд бичсэн юм. Тодруулбал, уг эм нь капсултай байсан бөгөөд капсулыг нь задлахад дотор нь юу ч байхгүй хоосон байгаа талаар бичжээ. Улмаар хэд хэдэн ширхэгийг задалж үзээд хоосон байсан тул зургийг нь дарж, ээжүүдийн “Mom” фэйж хуудсанд нийтэлсэн байлаа. Улмаар мөн л уг компанийн үйлдвэрлэдэг, өөрийнхөө хэрэглэдэг “Магне В6”-г хэр чанартай эм болохыг мэдэхийг хүсч буйгаа илэрхийлсэн байв.
-“ЭССЕНЦИАЛЕ ФОРТЕ Н” ЭМ ӨНГӨРСӨН АРВАННЭГДҮГЭЭР
САРААС ХОЙШ ТАСАРЧЭЭ-
Бид “Эссенциале форте Н” эмийн талаар бодит мэдээллийг хүргэхээр хэд хэдэн эх сурвалжтай холбогдож тодрууллаа. Эл эмийг “МОНОС” эмийн сан ОХУ-аас импортолж оруулж ирж зардаг болоод нэлээд хэдэн жил болжээ. Тиймээс эмийн талаар мэдээлэл авахаар “Монос”-ийн нэг салбарт орлоо.
Тус эмийн сангийн эрхлэгч хэлэхдээ “Манайх энэ эмийг “Sanofi” компаниас албан ёсоор оруулж ирж, бүх салбараараа зарж борлуулдаг байсан. Харин өнгөрсөн арваннэгдүгээр сарын сүүлээс хойш энэ эм тасраад ирэхгүй байгаа. Тэгэхээр арваннэгдүгээр сараас хойш худалдаалагдаагүй гэсэн үг.
Капсултай эм мэдээж дотроо хоосон байна гэж байхгүй. Хуурай, эсвэл өтгөн байдалтай эм заавал байх ёстой. Бид эмийн санчдын ажил үүргийн хүрээнд үйлчлүүлэгчдэдээ эл эмийг хэрхэн хэрэглэх талаар заавар өгдөг. Харин дотроо хоосон байсан эсэх талаар “Sanofi” компанийн Монгол дахь төлөөлөгчдөөс асуусан нь дээр байх” гэсэн хариулт өглөө.
-КАПСУЛД НУНТАГ БИШ ӨТГӨН ТОСОРХОГ ЭМ БАЙДАГ ГЭВ-
“Sanofi” компанийн Монгол дахь эмч төлөөлөгчөөс энэ талаар тодруулахад тэрээр “Фэйсбүүкт байгаа мэдээллийг харсан. Тэр бол ташаа мэдээлэл юм. Иргэд “Эссенциале форте Н” эмийг бусад капсултай эмтэй адил дотор нь хуурай, цагаан нунтаг эм байдаг гэж боддог юм байна. Гэхдээ бүх эм тийм биш.
“Эссенциале форте Н” эм нь дотроо ханаагүй тосны хүчил агуулсан, гоё үнэртэй, өтгөн тосорхог эмтэй байдаг. Тэр эм нь капсулынхаа аль нэг талд нэлээд цаана байрладаг. Хальт харахад хоосон юм шиг харагддаг ч шахахад тосорхог эм гарч ирдэг. Тиймээс хоосон байна гэсэн мэдээлэл худлаа юм.
Иргэд капсулынхаа доод ёроолыг шахаж үзэх хэрэгтэй. ОХУ-д ч гэсэн өнгөрсөн жил энэ эмийн талаар яг адилхан мэдээлэл тархсан. Харин “Sanofi” компани эмийн талаар тайлбар хийж, наалдамхай бор эм байдаг тул шахаж үзээрэй гэсэн хариу мэдэгдэл хийснээр буруу мэдээллийг хязгаарлаж чадсан байдаг” гэлээ.
“Эссенциале форте Н” нь элэг хамгаалах бэлдмэл юм. Энэхүү бэлдмэл нь элэгний бодисын солилцооны идэвхи алдагдсан үед элгийг өндөр идэвхи бүхий шимэгдэхэд бэлэн эссенциалийн фосфолипидээр хангаж өгдөг байна. Эдгээр эссенциалийн фосфолипидууд нь химийнхээ бүтцийн хувьд дотоод фосфолипидүүдтэй яг тохирдог учраас элэгний эсийн мембранаар дамжин эсэд нэвтэрдэг ажээ.
Энэ эмийг хэрэглэснээр:
-элэгний эсийн ферментийн идэвхи хэвийн болж,
-элэгний энергийн зарцуулалтын түвшин багасган,
-элэгний эсийн нөхөн төлжилтийг хангаж,
-цөсний физик-химийн шинж чанарыг тогтвортой болгох ач холбогдолтой юм байна.
Б.БУРМАА