Засгийн газрын өргөтгөсөн хуралдаанаар гарсан шийдвэрийг Засгийн газрын хэрэг эрхлэх газрын дарга Г.Занданшатар танилцууллаа.
Тэрбээр “2018 оныг хариуцлагын жил болгон зарлаж тодорхой албан, үүрэг даалгавар өгсөн. Үүний үр дүн, жилийн тайланг хэлэлцлээ. Мөн Засгийн газрын 2018 оны 258 дугаар тогтоолоор төрийн албанд бүх шатны сахилга хариуцлагыг бэхжүүлж, үүрэг даалгаврыг сайжруулах тогтоол гарсан. Энэ хүрээнд төрийн албаны шалгалтыг 13 яам, бүх агентлаг, 21 аймаг, 330 суманд зохион байгуулсан. Төрийн албаны шалгалтад хууль эрхзүй, мэдээлэл технологийн тест, төрийн албаны байгууллагын үйл ажиллагааны үнэлгээг тавьж үзсэн. Энэ бүх шалгалтаар тодорхой үр дагавар өгч байна. Сахилга хариуцлагын үр дүн, мэргэжлийн ур чадварыг сайжруулах, төрийн албыг тогтвортой, хариуцлагатай болгох зэрэг тодорхой үүрэг даалгавар өгсөн. Энэ бүхэнд үндэслэж иргэдийн санал, гомдлын судалгаа хийсэн. Мөн тус судалгаанд үндэслэж 2019 оныг “Иргэн төвтэй төрийн үйлчилгээний жил” болгон зарлаж байна. Энэ төрийн гол бодлого нь ардчилсан төр ард түмний сонголтоор байгуулагддаг. Үндсэн хуулийн 3.1 дэх хэсгийн “Төрийн бүх эрх мэдэл ард түмний гарт” гэсэн зүйлийг үндэслэж, танил талаар үйлчилдэг, ядуу дорой хүмүүсийг ялгаварладаг гэдэг гомдлыг ард иргэдийн зүгээс тавьсан. Тиймээс иргэн төвтэй, иргэддээ үйлчилдэг төрийн албыг төлөвшүүлэх соёлыг бий болгоё. Өөрөөр хэлбэл, ард түмний төрд итгэх итгэл төрийн албан хаагчийн үнэнч, шударга ёс шууд хамаарах учир төрийн албан хаагч нь төрд итгэх ард түмний итгэлийг тээгч, иргэддээ зөв, шударга, нээлттэй үйлчлэх нь энэ жилийн зорилго юм.
Мөн энэ оны нэгдүгээр сарын 1-нээс эхлээд төрийн албан хаагчийн шинэ хууль үйлчилж байна. Засгийн газрын гурван тулгуурт бодлогын нэг суурь нь засаглалын реформ, төрийг төр шиг болгох зорилго ч бий. Төрд мөнгө байхгүй гэдэг. Төрийн мөнгө ард түмний, төрийн мөнгө. Тэр мөнгөөр цалинжиж буй төрийн албан хаагч төрдөө, иргэддээ ил тод нээлттэй, шударга үйлчилдэг энэ арга хэмжээг хэрэгжүүлэх зорилгоор иргэн төвтэй төрийн үйлчилгээний жилийн хүрээнд таван үндсэн зарчмыг үндэслэж иргэдийн хэрэгцээнд суурилсан төрийн үйлчилгээг нэмэгдүүлэх, ил тод байдал, иргэдийн оролцоотой төрийн үйл ажиллагааг ард түмнийг сонсч шийдвэр гаргадаг байх, төрийн үйлчилгээний оролцоо чиг үүргийг бий болгох, үр дүнд суурилсан бодлогыг тогтолцоог нэмэгдүүлэх гэсэн таван зорилтын хүрээнд 320 үйлчилгээг цахим болгож байна.
Цаашид тендер тусгай зөвшөөрлийг цахимаар хүний оролцоогүйгээр хиймэл оюун ухаан ашиглаж хийх энэ бүхэн Иргэн төвтэй төрийн үйлчилгээний хийх ёстой 10 үндсэн ажлын үр дүн болно.
Мөн ард түмэнд эдийн засгийн өсөлт, үр өгөөжийг хүргэх зорилгоор 2014 оноос хойш нэмэгдээгүй байсан тэтгэвэр, тэтгэмжийг нэмэгдүүлж байна. Багш, эмч нарын цалинг манай Загийн газар ажил авч байсан үеэс 29.6 хувиар нэмэгдүүлж байна. Нөгөө талаасаа Иргэн төвтэй төрийн үйлчилгээний шаардлагыг нэмэгдүүлсэн шийдвэрийг Засгийн газрын хуралдаанаас гаргаж байна” гэв.
Р.Хишигжаргал