Монгол Улсын Ерөнхийлөгч прокурорын удирдах ажилтны зөвлөгөөнд оролцлоо. Энэ үеэр албан тушаалаа урвуулан ашиглах замаар эдийн засгийн гэмт хэрэгт холбогдсон атлаа хуулийн дагуу хариуцлага хүлээхгүй байгаад иргэд бухимдалтай байна. Хуулийн байгууллага үүнд дорвитой алхам хийсэнгүй. Тиймээс иргэдийн хүлээлтийг тодорхой болгож, хуулийн хүрээнд шударга ажиллахыг Ерөнхийлөгч Х.Баттулга прокуроруудаас хүслээ. Тэрбээр “Прокурорын байгуулллагатай албан тушаалын хэрэг дээр хамтарч ажиллахаа илэрхийлсэн. ЖДҮ-гийн хэргийн хүрээнд УИХ-ын чуулганы үеэр шударга ёс танхимаас эхлэх ёстой. Гэтэл хаана байна гэж хэлсэн. Тэгвэл энэ үгийг би бас асуумаар байна. Та нар санал нэгдэх байх. Гэтэл Ерөнхий прокурорын орлогч ЖДҮ-гээс зээл авсан. Тэгсэн атлаа Ерөнхий прокурор бусдаас шударга ёс нэхэх шаардлага байна уу гэж иргэд ярьж байна. Орлогч прокурор Амгаланбаатарт хариуцлага тооцоогүй.

Прокурорын тухай хуулийн 46.5 дугаар зүйлд зааснаар Улсын ерөнхий прокурор нь түүний орлогчийг эрүүгийн хэрэг үүсгэж яллагдагчаар татан шалгахтай холбогдуулан бүрэн эрхийг нь түтгэлзүүлэх эсэх асуудлыг эрх бүхий байгууллагын саналыг үндэслэн Монгол Улсын Ерөнхийлөгч шийдвэрлэдэг юм байна. Ингэхээр та бид ажил байгаа гэдгийг хуулиар заагаад өгч. Үүнийг сануулах нь илүүц эсэхийг би хэлж мэдэхгүй нь. Орлогчийнхоо асуудлыг шийдэж байж, бид нэг зүг рүү харна. Би бол өөрт чинь маш тодорхой хэлж байсан. Орлогч прокурорын хувьд эхнэр нь зээл авсан гэдгийг хэлсэн. Үүнийгээ тодорхой болго. Өмнө нь намайг салбарын сайд болох үед ЖДҮ-гийн зээл банкаар дамждаг байсан. Гэтэл 2016 онд Засгийн газрын түр журам гаргаад арваннэгдүгээр сараас сайдын гарын үсгээр гаргадаг болсон байна лээ. Сайд олгодог болохоор гишүүд авах нь ойлгомжтой. Өнгөрсөн 2018 онд 134 зээл олгосноос 121-нд тодорхой хэмжээгээр нөлөөлөл орсон болох нь тодорхой боллоо гэж Ерөнхий прокурорын хэлсэн нь үүгээр батлагдаж байна. Бас нэг асуудал байна. Утаанд олон зуун тэрбум төгрөг зарцуулсан. Үүний хариуцлага үүрэх хүмүүс хаана байна. Зуух шахсан эзэн тодорхой, зарцуулсан мөнгө нь тодорхой байна. Гэтэл хариуцлага хүлээсэн хүн алга. Сайншандад боловсруулах үйлдвэр байгуулах гэтэл тэнд ажиллаж байсан хүмүүсийг цагдан хорьсон. Төмөр зам бариад гаднын улсаас хараат бус болъё УИХ-аар батлаад ажил эхлүүлэх гэтэл эрүү үүсгээд шоронд хорьчихно. Дотооддоосоо хүнсээ хангая гэхээр бас ажил хийсэн залуучуудыг шоронд хийчихдэг.

Утаатай холбоотой баримтыг энэ долоо хоногт прокрорт хүлээлгэж өгнө.

Энэ бол бидний ирээдүй болсон үр хүүхэдтэй холбоотой асуудал учир хариуцлага тооцох ёстой гэдэг байр суурьт хатуу зогсоно. Хэрэг хөөн хэлэлцэх хугацаа дууссан гэж ярихгүй биз дээ.  Дараагийн нэг асуудал нь Салхитын мөнгөний ордыг газрын зураг дээрээс хайгаад олохгүй. Зориудаар зургийг нь устгасан. 500 сая ам.доллартай нөөц гэдэг нь 1983 онд батлагдсан. 2014 оноос хүдрийн баяжмалыг урагш гаргасан. Тэндээ боловсруулаад Монгол руу оруулдаг. Гэтэл бидэнд дотооддоо боловсруулах боломж бий. Би үүнийг хэлэх гэж ирлээ. Азаар ийм булхайтай зүйл хийсэн хүмүүс хоорондоо маргалдаж, хэрэг цагдаагийн газарт шилжсэн. Нөөц ашиглсаны таван хувийг төлдөггүй. Баяжмалынхаа агуулгыг дарж мэдээлдэг замаар татвараас зайлсхийдэг. Гааль, татварын мэдээлэл зөрөх болсноор энэ хэрэг олон нийтэд анзаарагдах болсон. Уурхайн хамгаалалтын алба нь нийслэлийн ШШГ-ын дарга Цогжавхалангийн хүүгийн өмчлөл. Тиймээс прокурорууд шударга ажиллахыг хүсье. Би Ерөнхийлөгчийн хувиар та нарын ажилд оролцох гэсэнгүй. Үүнийг ойлгоорой гэв.

Г.Нацаг