УИХ дахь МАН-ын бүлэг өнөөдрийн хуралдаанаар хоёр асуудлыг хэлэлцжээ. Энэ талаар УИХ дахь МАН-ын бүлгийн дарга Д.Тогтохсүрэн “Томуу, томуу төст өвчний вакциний хүрэлцээ хангамжийг нэмэгдүүлэх зайлшгүй шаардлагатай байна. Тиймээс 2019 оны төсвийн тодотгол, 2020 оны төсөвт суулгахад доод тал нь 10 орчим тэрбум төгрөг шаардлагатай. Мөн нийслэлийн хүүхдийн хэвтэн эмчлүүлэх орны тоог нэмэгдүүлэх асуудлаар ярилцлаа” гэв. Харин Эрүүл мэндийн сайд Д.Сарангэрэл “Улсын хэмжээнд томуу, томуу төст өвчний амбулторийн үзлэг 8.4 хувиар буурсан үзүүлэлттэй байна. Гэхдээ тайвширч болохгүй. Учир нь уг өвчний вирус эргэлдсээр байгаа. Өчигдөр дүүргийн эмнэлгүүдээр явж үзэхэд орны ачаалал 3.6 хувиар нэмэгдсэн байдалтай байлаа. Цаашид уг өвчний дэгдэлтийн үед гал унтраах байдлаар арга хэмжээ авах биш хүүхдийн орны хүрэлцээтэй байдалд анхаарахыг Засгийн газарт тавьсан. Бүлгийн хурлаар бас хэлэлцлээ. Энэ хүрээнд 700-1000 хүүхдийн орны төсвийг шийдвэрлэх, хүн амаа вакцинаар хангах асуудалд санхүүжилт шаардлагатай зэрэг шийдвэрийг гаргалаа” гэв. Ингээд УИХ дахь МАН-ын бүлгээс сэтгүүлчдийн сонирхсон асуултад хариулт өглөө.
-Хувийн хэвшлийх олон эмнэлгүүд үйл ажиллагаа явуулдаг. Энэ томуу, томуу төст өвчний дэгдэлтийн үеэр тус эмнэлгүүдтэй хамтарч ажиллах боломж байдаггүй юм уу?
-Д.Сарангэрэл: Хувийн хэвшлийн эмнэлгүүд бидэнд хэрхэн хамтарч ажиллах талаар саналаа тавьж байгаа. Энэ хүрээнд Сонгинохайрхан дүүргийн том хүний амбултори болон хэвтэн эмчлүүлэх үйлчилгээг “Ачтан” эмнэлэг рүү шилжүүлсэн.
-Ажлаа өгөх гэж буй нэр бүхий хоёр сайдын орны хүнийг тодруулсан байгаа юу?
-Д.Тогтохсүрэн: Сайдыг огцруулах чөлөөлөх асуудлыг энэ долоо хоногт шийдвэл ирэх долоо хоногоос орны хүн хэн байх талаар яригдаж эхлэх байх.
-УИХ-ын даргыг огцруулах асуудалд бүлэг ямар байр суурьтай байна вэ?
-Д.Тогтохсүрэн: Өнгөрсөн долоо хоногт Ерөнхийлөгчийн өргөн барьсан Монгол УИХ-ын дэгийн тухай хуулинд нэмэлт өөрчлөлт оруулах, УИХ-ын тухай хуульд өөрчлөлт оруулах хуулийн төслийг баталсан. Ирэх баасан гаригаас уг хууль хшчин төгөлдөр үйлчилнэ. Тиймээс хууль хэрэгжиж эхэлсний дараа уг асуудал яригдана.
-Эрүүл мэндийн салбарт царцаагдсан төсөл хөтөлбөрүүд хэчнээн байна вэ. Сая Замын-Үүдэд осол гарахад эмнэлгийн хүрэлцээ муу байна гэх мэдээлэл байсан?
-Д.Сарангэрэл: Эрүүл мэндийн салбарт царцаагдсан төсөл хөтөлбөрүүд олон байсан. Өнөөдөр олон улсын болон дотоодын төсөл хөтөлбөрөөр хэрэгжиж байгаа нэг ч царцсан төсөл хөтөлбөр байхгүй. Замын-Үүд суманд байгуулах 100 ортой эмнэлгийн бүтээн байгуулалтын ажил царцаагдсан байсныг орон нутагт эрхийг нь шилжүүлснээр үйл ажиллагаа нь хэвийн болсон. Санхүүжилт нь хийгдээд явж байна.
Б.Лхам
Сэтгэгдэл (1)