Намрын чуулган эхлээд дөрвөн сар гаруй хугацаа өнгөрөхөд УИХ-ын гишүүд хэрэлдэж, уралцсан л олон болохоос хийж бүтээсэн нь тун цөөхөн. Ард түмний дуу хоолой болж шударга ёс тогтооно гэж ам бардам хэлцгээж, гишүүн болсон өнөө хэдийн маань олонх нь сангуудыг сааж, АСЕМ-аас санхүүжилт авч, ЖДҮ-г дээрэмдсэн бол зарим нэг нь бүр улаан махны хэргээр аавын хаалга татах шахав.
Ард иргэдийнхээ өмнө арчаагүй байдлаа өдөр болгон харуулж, цахим ертөнцөөр нэг нэгнийхээ эсрэг турхисан довтолгоо газар авлаа. Ард түмэн ч гэсэн тэдний эл худал, үнэн мэдэгдэхгүй үгэнд нь төөрч будилан, албан тушаалын төлөөх зодоон цохионоос нь төвөгшөөж эхлэв. Хамгийн наад зах нь гэхэд “Өөрчилье, шинэчлэе” гэсэн урианд нь итгэж Ц.Элбэгдоржийг найман жил Ерөнхийлөгчөөр өргөмжилсөн. Төрийн дээр заларсан түүний хамгийн түрүүнд хийсэн зүйл нь экс Ерөнхийлөгч Н.Энхбаярын оймсыг гозолзуулсан явдал гэхэд бараг хилсдэхгүй. Эл үйлдэлдээ сэтгэл ханасан тэрбээр улсын баяр наадмаар төрийн есөн хөлт цагаан тугаа тойрч дэвсэн. Түүнийг ийм жүжиг тавьж байх хойгуур улсын өрийг тэглэсэн ачтанаа хар нүхэнд хийлээ гэж настангууд халагласан. Тэгээд зогсохгүй улс орны эдийн засаг сөхөрч, инфляци хөөрөгдөх тэр үед Элбэгээгийн хийсэн үйл лайнаас боллоо гэж бас л халагласан. Уг нь бол дэлхийн эдийн засаг тэр чигтээ саарч, тооцоо судалгаагүй төсөв баталсны гороор л эдийн засгийн өсөлт нойль заасан юм шүү дээ. Эндээс л “нэр хугарахаар яс хугар” гэдэг үг ямар үнэ цэнэтэй болох нь харагдана.
Тэгвэл Н.Энхбаярын оймсыг гозолзуулснаас эхэлсэн гээд хэлчихэж болох улс төрийн зодоон өнөөдөр жагсаал цуглаан хийх замаар бусдыг шантаажилдаг хэлбэрт шилжээд байна. Өнгөц харахад байдал л нэг хэвийн цуглаан мэт боловч начир дээрээ нам доторх хагарал гэдгээрээ бусдаас онцгойрч байгаа. Төрийн экс тэргүүнээ аавын хаалга татуулж, улмаар Их хуралд өрсөлдөх замыг нь хаасан шиг ээ, өнөөдөр хууль санаачлах замаар Их хурлын даргаа авч хаях гэж байна. Тэд санасандаа хүрч хуулиа батлуулсан. Тэдний санаа, зорилгыг биелүүлэх “азын” хууль нь энэ сарын 25-наас хэрэгжиж эхэлнэ гэх. Эндээс л жагсаал, цуглаан хийж, хууль санаачлах замаар Их хурлын даргаа авч хаясан хүмүүс магад дараагийн удаа Ерөнхийлөгчөө аваад хаяахад гайхах юмгүй болох нь. Ийм байдалтай элээсэн он жилээ ард түмэн минь эргээд нэг харахад илүүдэхгүй биз ээ.
Эндээс л одоогийн 76 гишүүд маань гандангийн тагтаа лугаа адил болжээ. Ард түмнийхээ өмнө амлалт өгч УИХ-д гарангуутаа дэмий сэлгүүцэнэ. Улсын хөрөнгийг идэж ууж, завших болохоороо ах, дүү хамаатан саднаараа нийлж луйвардана. Бүр намаараа нэгдэж, саймширч байгаад зувчуулна. Тэгсэн атлаа бүгд гэмгүй царайлж, шударга ёс ярьцгаах. Үүнийг нь Б.Батзориг тэргүүтэй Их хурлын гишүүдийг авч үлдсэн жишээнээс тодхон харж болно.
Тиймээс л алган дээрх будаанаас минь аргыг нь олж идэнгүүтээ нисдэг гандангийн тагтаа хэдэн тагтаатай зүйрлэсэн юм.
Нэг ёсондоо жижигхэн бялзуухайн далавч ургаж, жигүүрээ дэлгэх тэр мөчид атга будаа өгч амийг нь аварсан ачтаныхаа дээрээс сангасаа хаяхаас өөр ачлалгүй тэр нэгэн шувуутай адил билээ, тэд.
С.Нацагтовуу